ठाणे, ता. १८ : शहरात मोठे झाड पडून दोघे मजूर जखमी झाले आहेत. ठाणे स्टेशन रोडवरील सार्वजनिक बांधकाम विभागाच्या आवारात रविवारी (ता. १८) दुपारी साडेबाराच्या सुमारास ही घटना घडली.
ठाणे स्टेशन रोडवरील ठाणे मराठी ग्रंथ संग्रहालयाजवळ मोठे झाड पडल्याची माहिती ठाणे महापालिका आपत्ती व्यवस्थापन कक्षाला देण्यात आली होती. या घटनेची माहिती मिळताच अग्निशमन दल आणि आपत्ती व्यवस्थापन विभागाने तत्काळ घटनास्थळी धाव घेतली. या वेळी पडलेले झाड जवळच असलेल्या मराठी ग्रंथ संग्रहालयाच्या इमारतीला टेकले होते. त्यामुळे मराठी ग्रंथ संग्रहालयाच्या संरक्षण भिंतीच्या दुरुस्तीचे काम करणारे दिलीप गुप्ता (३५) आणि सुनील गौड (४८) हे दोघे मजूर जखमी झाले आहेत. त्यांच्यावर कळवा येथील छत्रपती शिवाजी महाराज रुग्णालयात दाखल करून उपचार करण्यात आले. या घटनेत दिलीप यांच्या हाताला आणि खांद्याला तर सुनील यांच्या हाताला किरकोळ दुखापत झाली आहे.