आठवडा बाजारात सुकी मच्छी खरेदीसाठी गर्दी
पडघा, ता. १८, (बातमीदार) ः पन्नास खेडी-पाडी गावाचे व्यापारी केंद्र असलेल्या भिवंडी तालुक्यातील पडघा येथील रविवारचा आठवडा बाजार सुकी मच्छीसाठी प्रसिद्ध आहे. या आठवडा बाजारात पावसाळ्यात साठवून ठेवण्यासाठी सुकी मच्छी खरेदीसाठी रविवारी (ता.१८) नागरिकांनी गर्दी केली होती.
पावसाळ्यात मच्छीमारी बंद असल्याने ओली मच्छी बाजारपेठेत उपलब्ध होत नाही. त्यामुळे मच्छी खवय्यांचे हाल होतात. तसेच, पावसाळ्यात शेतीची कामे सुरू असल्याने बाजारात जायला शेतमालकांना वेळ नसतो. ही सुकी मच्छी पडघा येथील आठवडा बाजारात मुबलक मिळत असल्याने परिसरातील शेतकऱ्यांसह कल्याण, भिवंडी, शहापूर, अंबाडी, वाडा, कसारा, मुरबाड येथील नागरिकांनी खरेदीसाठी मोठी गर्दी केली होती.
यावेळी सुकट ४०० ते ५००, बोंबील ५०० ते १२००, मांदेली ३००, ढोमेली २५०, जवळा ३००, वाकटी ४००, दांडी २५० बोंबली २५० रुपये प्रती किलो दराने विक्री केली जात होती. तर सर्वाचेच आवडते सुकट, बोंबील, जवळा यांचे दर मागच्या वर्षीपेक्षा चांगलेच वधारलेले दिसत होते. तरीदेखील मच्छी खरेदीसाठी नागरिकांनी तुंडुब गर्दी केली होती. तर सुकी मच्छी खरेदीसाठी खवय्याची गैरसोय होऊ नये म्हणून वसई, अर्नाळा, सफाळा, अगासन, भाईंदंर, उत्तन, पांचुबंदर, पालघर येथील कोळी महिला विक्रीसाठी मोठ्या प्रमाणात दाखल झाल्या होत्या. तर स्थानिक सुकी मच्छी विक्रेते सुद्धा आपली दुकाने लावून सज्ज झाले होते.
फोटोओळ
पडघा ः आठवडा बाजारात पावसाळ्यात साठवून ठेवण्यासाठी सुकी मच्छी खरेदीसाठी नागरिकांनी गर्दी केली होती.