सकाळ वृत्तसेवा
डोंबिवली, ता. २० : कल्याण परिसरात दोन दिवसांत पोलिसांच्या अमली पदार्थ विरोधी पथकाने गांजा, मेफोड्रेन या अमली पदार्थांची तस्करी करणाऱ्या दोन जणांना अटक केली आहे. त्यांच्याकडून पोलिसांनी एकूण ६० हजारांचा गांजा, एम. डी. पावडरचा साठा जप्त केला आहे. दोन्ही प्रकरणात गुन्हा दाखल करण्यात आला आहे.

कल्याण, डोंबिवली परिसरातील अमली पदार्थांचे अड्डे उद्ध्‍वस्त करण्याचे, या पदार्थांची तस्करी करणाऱ्यांची धरपकड मोहीम पोलिस उपायुक्त अतुल झेंडे यांच्या आदेशावरून सुरू आहे. विशेष पथक आणि स्थानिक पोलिस ही संयुक्तपणे कारवाई करत आहेत. कल्याण पूर्वेतील कोळसेवाडी पोलिस ठाण्याच्या हद्दीत सोमवारी (ता. १९) रात्री पोलिसांचे पथक गस्त घालत होते. त्या वेळी विजयनगर, आमराई परिसरात एका चाळीत राहणारा आकाश गणेश गायकवाड (वय २७) हा गांजाची तस्करी करत असल्याची माहिती मिळाली. पोलिसांनी चाळीवर छापा मारला असता २११ ग्रॅम गांजा आढळून आला. पोलिसांनी त्याची चौकशी करून त्याला अटक केली.

दुसऱ्या प्रकरणात, अमली पदार्थ विरोधी पथक आणि खडकपाडा पोलिसांनी आंबिवलीतील इराणी वस्ती भागातील गुलाम मोसन खान उर्फ इराणी (वय ३५) याला इंदिरानगर झोपडपट्टी, वाल्मिकी शाळा भागातून ताब्यात घेतले. त्याच्याकडून ५६ हजारांची मेफोड्रेन पावडर जप्त केली. याप्रकरणी खडकपाडा पोलिस ठाण्यात गुन्हा दाखल आहे. त्याच्यावर यापूर्वी विविध पोलिस ठाण्यांत एकूण आठ गुन्हे दाखल आहेत.