दिशा सामाजिक संस्थेच्या क्रिकेट स्पर्धेत वसईकर संघ विजेता
विरार, ता. २० (बातमीदार) ः दिशा सामाजिक संस्थेच्या माध्यमातून सामाजिक कार्यकर्ते रॉनल्ड गोम्सतर्फे अंडरआर्म क्रिकेट स्पर्धा आयोजित करण्यात आली होती. या स्पर्धेत वसईतील तब्बल ३८ संघांनी सहभाग घेतला होता. यामध्ये वसईकर संघाने प्रथम तर फर्नांत्तआळी संघाने द्वितीय विजेतेपद पटकावले आहे. युवकांना प्रोत्साहन देण्यासाठी माजी आमदार क्षितिज ठाकूर आणि चित्रपट निर्माते उत्तुंग ठाकूर, वसई युवदर्शनचे संचालक रेव्ह ख्रिस्तोफर वाझ उपस्थित होते. क्रिकेट स्पर्धेचे समालोचन अमेय तुस्कानो, ईमेल आल्मेडा, फ्रँकसन परेरा, विजय वाझ तसेच सोबर्स लोपीस यांनी केले.
खेळातून सामाजिक कार्य या नावीन्यपूर्ण उपक्रमाला समाजातील दानशूर, हितचिंतक आणि देणगीदारांची सकारात्मक साथ दिशा सामाजिक संस्थेला लाभली. संस्थेचे मागील सामाजिक कार्य पाहता यंदा पाच लाखांचा निधी उभा करण्यात संस्थेला यश आले आहे. स्पर्धेचे मुख्य उद्दिष्ट समाजातील गरीब कर्करुग्णांना आर्थिक सहाय्य करण्याचे आहे. त्याची सुरुवात क्षितिज ठाकूर यांच्या हस्ते वसई येथील चिमुकला हृदय अविनाश बोलियार याच्या उपचारासाठी ५० हजार रुपयांचा धनादेश देऊन करण्यात आली. दिशा सामाजिक संस्थेतर्फे वर्षभर रक्तदान शिबिर, दुचाकीस्वारांना हेल्मेट वाटप, कर्करोग निदान शिबिर, निरनिराळे सरकारी दाखले शिबिर, ज्यूट बॅग वाटप तसेच युवकांना करिअर मार्गदर्शन कार्यक्रम राबविण्यात येत असते.