भिवंडी, ता. २५ (वार्ताहर) : भिवंडी शहरातील कामतघर परिसरातील विविध विकास कामांसाठी माजी उपमहापौर मनोज काटेकर यांच्या प्रयत्नातून आमदार महेश चौगुले यांच्या सहकार्याने सरकारकडून विविध विकासकामांसाठी ३० कोटी रुपये मंजूर केले आहे. या विकासकामांचा भूमिपूजन सोहळा आमदार महेश चौघुले यांच्या हस्ते कामतघर ओसवाल वाडी परिसरात नुकताच पार पडला. याप्रसंगी शिवसेना शहर जिल्हाध्यक्ष सुभाष माने, भाजप शहराध्यक्ष रवीकांत सावंत, सार्वजनिक बांधकाम विभागाचे उपअभियंता दत्तू गीते, आनंद गद्रे, वंदना काटेकर, जयेंद्र सावला, संजय काबुकर, विनोद मालदे, हितेश मारू, रतीलाल सुमरिया, सुंदर नाईक, जीवराज नागरिया यांसह मोठ्या संख्येने परिसरातील नागरिक उपस्थित होते.
मनोज काटेकर यांनी कामतघर परिसरातील काँक्रीट रस्ते, आरसीसी नाले, पथदिवे बनवण्यासाठी उपमुख्यमंत्री एकनाथ शिंदे यांच्याकडे सतत केलेल्या पाठपुराव्यामुळे सरकारने ओसवालवाडी या भव्य अशा निवासी संकुल परिसरातील जागनाथ मंदिर ते वरद हाईट्स व मुनिसुव्रत चौक ते जांगीड ईलाईटपर्यंत काँक्रीट रस्ता, निर्मलधारा ते अमीधारापर्यंत काँक्रीट रस्ता, कल्पतरू गार्डन ते मुनिसुव्रत अपार्टमेंटपर्यंत काँक्रीट रस्ता व पथदिवे, कामतघर स्मशानभूमी ते भवानी नगर सी. सी. नाला व भवानी नगर येथील आर.सी.सी. रस्ता, साईनगर ते काटेकरनगर, तरे कम्पा‍ऊंडपर्यंत काँक्रीट रस्ता, भारत कॉलनी, चौधरी कंपाऊंड, भवानी नगर येथील काँक्रिट गटर पाथवेज,तरे कंपाऊंड,काटेकर नगर, नरेश नगर परिसरात सी.सी. रस्ता व गटर पाथवेज, कल्पतरू गार्डनसमोर आर.सी.सी. नाला बांधणे ही कामे या परिसरात केली जाणार आहेत. मनोज काटेकर निधी आणून काम पूर्णत्वास आणल्याने परिसराचा कायापालट होत आहे. याबद्दल आमदार महेश चौघुले, शिवसेना शहर जिल्हाप्रमुख सुभाष माने यांनी काटेकर यांच्या कार्याची प्रशंसा केली. काटेकर यांनी या परिसरात अत्याधुनिक स्मशानभूमी उभारण्याचा संकल्प जाहीर केला.