वसई-विरारच्या महिलांना बस प्रवासात ५० टक्के सवलत
विरार, ता. २३ (बातमीदार) : महाराष्ट्र शासनाच्या निर्देशानुसार एसटी बस प्रवासात महिलांना ५० टक्के सवलत दिली जाते. एमएमआरडीए क्षेत्रातील ठाणे व नवी मुंबई या महापालिकांनी या योजनेची अंमलबजावणी सुरू केली आहे. मात्र वसई विरार शहर महापालिका क्षेत्रातील महिलांना अद्याप ही सवलत मिळत नव्हती. वसई विधानसभा मतदारसंघाच्या आमदार स्नेहा दुबे पंडित यांनी महिलांसाठी बस प्रवासात ५० टक्के सवलत मिळावी, यासाठी परिवहन मंत्री प्रताप सरनाईक, महिला व बालविकास मंत्री आदिती तटकरे आणि वसई विरार महापालिका आयुक्त अनिलकुमार पवार यांच्याकडे सातत्याने पत्रव्यवहार व पाठपुरावा केला होता. त्याला यश आले असून, १ जूनपासून वसई विरार शहर महापालिका क्षेत्रातील महिलांना ५० टक्के सवलत मिळणार आहे.
शुक्रवारी पालिका मुख्यालयात आयुक्त पवार यांनी अधिकृत पत्राद्वारे स्नेहा दुबे पंडित यांना ही माहिती दिली. या निर्णयामुळे वसई-विरारमधील हजारो महिला प्रवाशांना आर्थिक दिलासा मिळणार आहे.