तुर्कियेसोबतची निविदा रद्द करण्याची भाजपची मागणी

मुंबई, ता. २३ : पाकिस्तानला पाठिंबा देणाऱ्या तुर्कियेवर भारताने बहिष्कार घातला असताना मुंबई महापालिका प्रशासनाने तुर्की बनावटीच्या चौपाट्यांवर जीवरक्षक रोबोटिक बचाव यंत्रे विकत घेण्यासाठी निविदा प्रक्रिया राबवली आहे. ही निविदा रद्द करण्याची मागणी भाजपने पालिका आयुक्तांकडे केली आहे. मुंबईच्या चौपाट्यांवर जीवरक्षक रोबोटिक बचाव यंत्रे विकत घेण्यासाठी महापालिका निविदा प्रक्रियेत तुर्कियेतील एक कंपनी पात्र झाली असून, प्रशासनाने या कंपनीस कंत्राट देण्याचे कार्यादेश दिल्याचे समजते. याविरोधात भाजपचे माजी नगरसेवक आणि प्रवक्ते भालचंद्र शिरसाट यांनी आक्रमक भूमिका घेतली आहे. संबंधित यंत्राच्या खरेदीसाठी काढण्यात आलेल्या निविदा आणि दिलेले कार्यादेश युद्धपातळीवर त्वरित रद्द करून तुर्कियेतील कुठलेही उत्पादन पालिकेने घेऊ नये, अशी मागणी पालिका आयुक्त आणि प्रशासक भूषण गगराणी यांच्याकडे शिरसाट यांनी केली आहे. तुर्कियेतील यंत्र खरेदी करण्यात आल्यास आम्ही ते रस्त्यावर चालू देणार नाही, त्याविरोधात तीव्र आंदोलन करू, असा इशाराही शिरसाट यांनी दिला आहे.
--------------