देवनार कचरा प्रकल्पाविरोधात जनहित याचिका
सकाळ वृत्तसेवा
मुंबई, ता.२३ : देवनार कचराभूमी येथील प्रस्तावित तीन हजार मेट्रिक टन कचऱ्याचे विजेत रुपांतरीत करणाऱ्या प्रकल्पाला स्थगिती देण्याची मागणी करणारी जनहित याचिका उच्च न्यायालयात करण्यात आली आहे. गोवंडीतील अल अब्बास चॅरिटेबल फाउंडेशनने ही याचिका दाखल केली आहे. या परिसरात होणाऱ्या धारावीतील रहिवाशांच्या स्थलांतरणालाही स्थगिती देण्याची मागणीही या याचिकेत करण्यात आली आहे.

देवनार कचराभूमी प्रकल्पाला परवानगी मिळाल्यास आधीच प्रदूषित परिसरात आणखी गंभीर पर्यावरणीय समस्या निर्माण होतील, त्याचप्रमाणे, परिसरात राहणाऱ्या दहा लाखांहून अधिक नागरिकांच्या जगण्याच्या अधिकाराचे गंभीररीत्या उल्लंघन होईल, असा दावा या याचिकेत करण्यात आला आहे. हा प्रकल्प ६०० मेट्रिक टन क्षमतेचा असून तो ऑक्टोबरपर्यंत सुरू होण्याची शक्यता आहे. गोवंडी, मानखुर्द, शिवाजीनगर, बैंगनवाडी आणि जवळपासच्या दाट लोकवस्तीच्या परिसरात अनेक वर्षांपासून देवनार कचराभूमी कार्यान्वित आहे. या ठिकाणी काही समाजकंटकाकडून वारंवार आगी लावण्याच्या घटना घडतात, येथे होणारे विषारी उत्सर्जन आणि घनकचऱ्याच्या गैरव्यवस्थापनामुळे या परिसरातील लोकांचे सार्वजनिक आरोग्य धोक्यात आले आहे. क्षयरोग, कर्करोग, दमा आणि इतर श्वसनाचे आजाराचे प्रमाण या भागात जास्त असल्याचे आकडेवारी सांगत असल्याचा दावाही याचिकेत केला आहे.

..
प्रकल्प रेटण्याचा घाट
देवनार कचराभूमी प्रकल्पाबाबत रहिवाशांच्या आक्षेपाकडे दुर्लक्ष करून देवनार कचराभूमीवरील प्रस्तावित कचऱ्याचे विजेत रुपांतरीत करण्याचा हा प्रकल्प रेटण्याचा घाट महापालिकेकडून घातला जात आहे. गेल्यावर्षी ऑक्टोबरमध्ये राज्य सरकारने धारावी पुनर्विकास प्रकल्पातील रहिवाशांना स्थलांतरित करण्यासाठी देवनार कचराभूमीची १२४ एकर जमीन देऊ केली होती; परंतु, अशा स्थलांतरामुळे आधीच दूषित आणि धोकादायक अशा क्षेत्रात आणखी लोकसंख्येची भर पडून सार्वजनिक आरोग्याला धोका निर्माण होण्याची शक्यताही याचिकेत व्यक्त केली आहे.