नवी मुंबई, ता. २४ : नवी मुंबई महापालिकेच्या आस्थापनेवर गट-क आणि गट-ड मधील ३० संवर्गात ६६८ पदांसाठी सरळसेवेद्वारे भरती प्रक्रिया राबवण्यात येत आहे. या प्रक्रियेत मोठ्या प्रमाणात अर्ज दाखल झाले आहेत. आतापर्यंत महापालिकेकडे तब्बल ८४ हजार इच्छुकांनी अर्ज सादर केले आहेत.
नवी मुंबई महापालिकेतील पदभरतीची जाहिरात २८ मार्च रोजी प्रसिद्ध झाली. अर्ज दाखल करण्यासाठी महापालिकेने १९ मे ही शेवटची मुदत देण्यात आली होती. १९ मेपर्यंत तब्बल ८४ हजार ७७४ इतके ऑनलाइन अर्ज प्राप्त झाले आहेत. प्राप्त अर्जांमध्ये सर्वाधिक २३ हजार ३४७ अर्ज हे लिपिक-टंकलेखक संवर्गाच्या १३५ जागांसाठी प्राप्त झाले आहेत. बहुउद्देशीय आरोग्य कर्मचारी (हिवताप) संवर्गाच्या ५१ जागांसाठी १५,४४७ अर्ज, तसेच कनिष्ठ अभियंता (स्थापत्य) संवर्गाच्या ८३ जागांसाठी १४,५५८ आणि स्टाफ नर्स/मिडवाईफ (G.N.M.) संवर्गाच्या १३१ पदांसाठी १२,६३४ अर्ज प्राप्त झालेले आहेत. अर्ज दाखल करणाऱ्या पात्र उमेदवारांनी भरती प्रक्रिया संदर्भातील माहिती जाणून घेण्यासाठी नवी मुंबई महापालिकेचे अधिकृत संकेतस्थळ www.nmmc.gov.in ला भेट द्यावी, तसेच महापालिकेचे अधिकृत फेसबुक, इन्स्टाग्राम, ट्विटर या समाजमाध्यमांना भेट द्यावी आणि सत्य व प्रमाणित माहिती जाणून घ्यावी. याविषयी कोणत्याही प्रकारच्या दिशाभूल करणाऱ्या माहितीला बळी पडू नये अथवा अफवांवर विश्वास ठेवू नये, असे आवाहन महापालिका आयुक्त डॉ. कैलास शिंदे यांच्या वतीने करण्यात येत आहे.