खारघर, ता. २५ (बातमीदार) : मुंबईतील हरिहर पुत्र समाजाकडून खारघरमधील संजीवनी रुग्णालयाला आरोग्य आणि शिक्षण क्षेत्रातील सर्वोत्तम स्वयंसेवी संस्था म्हणून पुरस्कार देऊन गौरविण्यात आले. हा पुरस्कार सोहळा शनिवारी (ता. २४) षण्मुखानंद सभागृहात पार पडला. हृदयविकार असलेल्या गरीब कुटुंबातील लहान बालकांचा हृदय संबंधित आजार असलेल्या मुलांवर मोफत शस्त्रक्रिया केली जाते. मागील वर्षी खारघर, नवी मुंबई, छत्तीसगड आणि हरियाणातील श्री सत्य साई संजीवनी रुग्णालयात ‘गिफ्ट ऑफ लाइफ’ या कार्यक्रमांतर्गत ३० हजार मुलांची मोफत हृदय शस्त्रक्रिया आणि उपचार करण्यात आले. या शिवाय मागील वर्षापासून श्री सत्य साई संजीवनी हेल्थकेअर स्किल्स डेव्हलपमेंट इन्स्टिट्यूटच्या वतीने मोफत आरोग्य सेवा कौशल्य प्रशिक्षणअंतर्गत १०वी आणि १२वीच्या विद्यार्थ्यांना आरोग्य सेवा क्षेत्रातील वैद्यकीय आणि सर्जिकल सहाय्यकांसह कुशल आरोग्य सेवा कौशल्य विकास आणि व्यक्तिमत्त्व विकास प्रशिक्षण देऊन रोजगार उपलब्ध करून दिला जात आहे. याची दखल घेत मुंबईतील हरिहर पुत्र समाजाच्या वतीने खारघरमधील संजीवनी रुग्णालयाला सर्वोत्तम स्वयंसेवी संस्था म्हणून पुरस्कार देऊन गौरविण्यात आले.