उल्हासनगर, ता. २५ (वार्ताहर) : उल्हासनगर गुन्हे शाखा युनिट-४ च्या पथकाने दोन सराईत दुचाकी चोरांना अटक करण्यात आली आहे. पथकाने तीन वेगवेगळ्या पोलिस ठाण्यांतील दुचाकी चोरीचे गुन्हे उघडकीस आणले आहेत. अवघ्या एका कारवाईत तब्बल एक लाख पाच हजार रुपये किमतीच्या तीन चोरीच्या दुचाकी जप्त केल्या आहेत.
युनिट कार्यालयातील पोलिस कॉन्स्टेबल अशोक थोरवे व रामदास उगले यांना अरुण गुप्ता (वय २२) आणि किसन गुप्ता (वय २२) हे दोघे सराईत आरोपी २२ मे रोजी ऑर्डनन्स फॅक्टरी रहिवासी कॉलनी भागात येणार असल्याचे समजले. त्यांनी सहाय्यक पोलिस निरीक्षक श्रीरंग गोसावी यांच्या नेतृत्वाखाली गणेश गावडे, राजेंद्र थोरवे, योगेश वाघ, चंदू सावंत, रितेश वंजारी आणि संजय शेरमाळे सहभागी होते. यांनी तत्काळ सापळा रचला आणि वरील दोन्ही आरोपींना अटक करण्यात यश मिळवले.
दुचाकी चोरीच्या घटनांना आळा बसावा, या उद्देशाने उल्हासनगर गुन्हे शाखेच्या युनिट-४ ने एका महत्त्वपूर्ण कारवाईत दोन आरोपींना अटक करत तीन गुन्हे उघडकीस आणले आहेत. या कारवाईमुळे उल्हासनगर, अंबरनाथ आणि हिललाइन परिसरातील पोलिस ठाण्यांत दाखल असलेल्या चोरीच्या गुन्हे उघडकीस आले.