कासा, ता. २५ (बातमीदार) : डहाणू पोलिस ठाण्याच्या हद्दीतील आगरजवळ असलेल्या एका हॉटेलात पालघर आणि डहाणू पोलिसांनी रात्रीच्या वेळी छापा टाकून जुगार खेळत असलेल्या ४१ जणांना अटक केली. त्यांच्याकडून तीन लाख रुपये रोख जप्त केले आहेत.

डहाणू शहरातील पारनाका-बोर्डी राज्य मार्गावर समुद्र बीचजवळ असलेल्या एका हॉटेलात गेल्या अनेक दिवसांपासून मोठ्या प्रमाणात जुगार खेळत असल्याची माहिती पोलिसांना मिळाली होती. त्यामुळे पालघर जिल्ह्याचे नवनिर्वाचित पोलिस अधीक्षक यतीश देशमुख यांच्या मार्गदर्शनाखाली आर. सी. बी. (पालघर), तसेच डहाणू पोलिस यांच्या नेतृत्वाखाली आगर येथील रिव्हरसाईड हॉटेलवर रात्री २ वाजण्याच्या सुमारास सुमारे २५ ते ३० पोलिसांनी छापा मारून जुगाऱ्यांना ताब्यात घेतले. या वेळी तीन लाख तीन हजार रुपये रोख, तसेच जुगार खेळण्याचे पत्ते व इतर साहित्य जप्त करण्याची पोलिसांनी कारवाई केली.