अलवीनाचे मारेकरी गजाआड
उत्तर प्रदेशमधील नोएडा येथून आरोपींची धरपकड

नवी मुंबई, ता. २५ (वार्ताहर) : उलवेतील २७ वर्षीय विवाहितेच्या हत्या प्रकरणातील फरार असलेले दोन्ही आरोपी अखेर पोलिसांनी बेड्या ठोकल्या. सुखबिर निर्मलसिंग राठिया (वय २४), गुरुप्रीत अवतार सिंग (२५) अशी या आरोपींची नावे आहेत. गुन्हे शाखेच्या पथकाने या दोघांना उत्तर प्रदेशमधील नोएडा येथून ताब्यात घेतले आहे. या हत्या प्रकरणातील मृत विवाहितेचा पती आणि त्याच्याकडून हत्येची सुपारी घेणाऱ्या दोन महिलांना अटक केली आहे.

उलवे सेक्टर-५ मध्ये राहणाऱ्या अलवीना अदमली खान (वय २७) या विवाहितेची रविवारी (ता. १८) मध्यरात्री भररस्त्यात गळा चिरून हत्या करण्यात आली होती. या हत्या प्रकरणाचा उलवे पोलिस आणि गुन्हे शाखेने तपास केला असता, मृत अलवीना व तिचा पती किशोरसिंग राजपूत या दोघांमध्ये आर्थिक देवाणघेवाणीतून तसेच घटस्फोट घेण्यावरून वाद झाल्याचे आढळून आले. त्यानुसार पोलिसांनी किशोरसिंग याला ताब्यात घेऊन त्याची चौकशी केल्यानंतर त्याने अलवीनाची हत्या घडवून आणण्यासाठी उलवेत राहणाऱ्या अलिशा त्यागी हिला सहा लाखांची सुपारी दिल्याचे उघडकीस आले. तसेच अलिशा त्यागी व डिंपल या दोघींनी पंजाब येथून सुखबिर राठिया व गुरुप्रीत सिंग या दोघांना अलवीनाची हत्या करण्यास सांगितले होते. त्यानुसार आरोपींनी अलवीनावर पाळत ठेवत तिची हत्या केली. त्यानंतर पोलिसांनी किशोरसिंग राजपूत, अलिशा त्यागी व डिंपल या तिघांना अटक केली होती. दरम्यान, अलवीनाची हत्या करणारे दोघे मारेकरी फरार झाले होते.

स्थानिक पोलिसांच्या मदतीने कारवाई
अलविना हत्या प्रकरणातील दोघे मारेकरी उत्तर प्रदेशमधील नोएडा येथे असल्याची माहिती मिळाल्यानंतर उलवे पोलिस आणि गुन्हे शाखा युनिट-२ मधील पोलिस उपनिरीक्षक अभय शिंदे व संतोष पिलाणे यांचे संयुक्त पथक शनिवारी (ता. २४) नोएडा येथे रवाना झाले. या पथकाने स्थानिक पोलिसांच्या मदतीने सुखबिर राठिया व गुरुप्रीत सिंग या दोन्ही आरोपींना ताब्यात घेतले. त्यानंतर पोलिसांनी नोएडा गौतमनगर येथील न्यायालयाकडून ट्रान्झिट रिमांड मिळवून दोन्ही आरोपींना घेऊन ते नवी मुंबईच्या दिशेने रवाना झाल्याची माहिती गुन्हे शाखेचे सहाय्यक पोलिस आयुक्त अजयकुमार लांडगे यांनी दिली.