शहापूर, ता. २५ (वार्ताहर) : जंगलातील रानडुकरांची शिकार करून त्यांची तस्करी करण्यासाठी मुंबईच्या दिशेने निघालेल्या टेम्पोवर वनाधिकाऱ्यांनी रविवारी (ता. २५) पहाटे ३ वाजेच्या सुमारास कारवाई केली. या वेळी टेम्पोमध्ये तब्बल १५ रानडुक्करे आढळून आली आहेत.
रविवारी मध्यरात्री २ वाजता वनअधिकाऱ्यांना गुप्त बातमीदाराकडून माहिती मिळाली. यानुसार शहापूर वनपरिक्षेत्र अधिकारी शैलेश गोसावी, वनपाल संदीप केदार, वनरक्षक संतोष खंदारे, वनमजूर अनंता पडवळ आदींच्या पथकाने मुंबई-नाशिक महामार्गावरील आसनगाव येथे सापळा रचून रानडुकरांनी भरलेला टेम्पो ताब्यात घेतला. त्या वेळी या टेम्पोत तब्बल १५ रानडुक्करांचे पाय बांधून ठेवलेल्या अवस्थेत आढळली. ही रानडुक्करे कत्तलीसाठी नेण्यात येत होती. टेम्पोचालक व त्याच्या सहाय्यकाला ताब्यात घेऊन चौकशी केली. या तस्करीचा मुख्य सूत्रधार राजेंद्र सखाराम पवार (वय ४८) याला नाशिकमधून अटक करण्यात आली आहे. या प्रकरणाचा अधिक तपास सुरू आहे.