नवी मुंबई, ता. २६ (वार्ताहर) : भररस्त्यात थांबलेल्या ट्रेलरला मागून येणाऱ्या भरधाव कारने धडक दिली. या अपघातात कारमधील एका महिलेचा मृत्यू; तर कारचालकासह इतर तिघे जण गंभीर जखमी झाले. ही घटना शनिवारी पहाटे पनवेलजवळच्या पुष्पकनगर येथे घडली. पनवेल शहर पोलिसांनी या अपघाताला जबाबदार असलेल्या ट्रेलरचाकलाला ताब्यात घेतले आहे.
अपघातात मृत झालेल्या महिलेचे नाव रेश्मा रवींद्र तोरस्कर (४६) असे आहे; तर जखमीमध्ये त्यांचा मुलगा राकेश तोरस्कर (२५), गीतेश गोपाळ कुळये (३२) आणि स्नेहा राजेंद्र जाधव (२०) या तिघांचा समावेश आहे. तोरस्कर कुटुंबीय आणि त्यांचे नातेवाईक मुंबईत नेपेन सी रोड येथील जयप्रकाश नगरमध्ये राहण्यास आहेत. तोरस्कर कुटुंबीय रत्नागिरी संगमेश्वर येथील आपल्या मूळ गावी गेले होते. त्यानंतर ते सर्व जण कारने मुंबईत परतत होते. कार राकेश तोरस्कर चालवत होता. शनिवारी पहाटे पाच वाजण्याच्या सुमारास त्यांची कार पनवेल-जेएनपीए मार्गावर पुष्पकनगरजवळ आली होती. दरम्यान, जेएनपीएच्या दिशेने जाणाऱ्या ट्रेलरचालकाने अचानक भररस्त्यात ट्रेलर थांबवला. त्यामुळे पाठीमागून भरधाव येणारी तोरस्करची कार या ट्रेलरवर धडकली. त्यामुळे कार ट्रेलरच्या पाठीमागे अडकून पडली. या अपघातात कारमधील रेश्मा तोरस्कर यांचा मृत्यू झाला; तर कारचालक असलेला त्यांचा मुलगा राकेश व दोघे नातेवाईक असे तिघे जण गंभीर जखमी झाले. त्यामुळे पोलिसांनी या सर्वांना रुग्णालयात दाखल केले. त्यानंतर पनवेल शहर पोलिसांनी या अपघाताला जबाबदार असलेला ट्रेलरचालक शंभू प्रेमचंद कुमार (५०) याच्या विरोधात गुन्हा दाखल करून त्याच्यावर पुढील कारवाई सुरू केली आहे.