सकाळ वृत्तसेवा
ठाणे, ता. २७ : पावसामुळे शहरातील परिस्थितीचा आढावा घेण्यासाठी ठाणे पालिकेच्या आपत्ती व्यवस्थापन विभागाला खासदार नरेश म्हस्के यांच्या पाठोपाठ राष्ट्रवादी शरद पवार पक्षाचे आमदार जितेंद्र आव्हाड यांनी भेट दिली. या वेळी मुंबईत साचलेल्या पाण्यावरून आव्हाड यांनी उद्धव ठाकरे यांच्या नावाने तुम्ही ओरडत होता, असा टोला खासदार म्हस्के यांना लगावला. यावर आम्ही नाही, तुम्हीच ओरडत होतात, असे मिश्किल उत्तर खासदार नरेश म्हस्के यांनी दिले.
मुंबई-ठाणे शहरात रविवारी मध्यरात्रीपासूनच पावसाने हजेरी लावली होती. सोमवारी सकाळपासून कोसळणाऱ्या पावसाने दाणादाण उडवून दिली. मुंबईची तुंबापुरी झाली तर, ठाणे शहरातील काही भागांत झाडांची, फांद्यांची पडझड झाली. याच पार्श्वभूमीवर ठाणे लोकसभा मतदारसंघाचे खासदार नरेश म्हस्के यांनी शहरातील परिस्थितीचा आढावा घेण्यासाठी आपत्ती व्यवस्थापन विभागाला भेट दिली. या वेळी पालिका मुख्यालयातील धर्मवीर आनंद दिघे सभागृहातील जनसंवाद कार्यक्रमानंतर आमदार जितेंद्र आव्हाड यांनी आपत्ती व्यवस्थापन विभागाला भेट दिली. या वेळी खासदार नरेश म्हस्के आणि आमदार जितेंद्र आव्हाड आमनेसामने आले होते. त्या वेळी आमदार आव्हाड यांनी मुंबईत साचलेल्या पाण्याचा मुद्दा उपस्थित केला.