कारचालकाच्या हत्येतील आरोपीला अटक
गुन्हे शाखेची २४ तासांत कारवाई
घाटकोपर, ता. २६ (बातमीदार) ः घाटकोपर पूर्वेतील हायवेवरून जात असताना झीशान रफीक शेख या कारचालकाला दुचाकीस्वाराने बाचाबाचीतून चाकूहल्ला करून ठार केले होते. या घटनेनंतर दुचाकीस्‍वार पळून गेला होता. अखेर या हत्येतील आरोपी सुरज जयस्वाल याला विक्रोळीमधून अटक केली आहे.
मुंबई गुन्हे शाखा युनिट सातने ही कारवाई केली. ओव्हरटेकिंगवरून झालेल्या वादानंतर आरोपीने दुचाकीचालक झीशान शेखची चाकूने वार करून हत्या केल्याचा आरोप आहे. आता त्याला गुन्हे शाखा पोलिसांनी पंतनगर पोलिसांच्या ताब्यात दिले आहे. गुन्हे शाखा पोलिसांनी हा खुनाचा गंभीर गुन्हा २४ तासांच्या आत उघडकीस आणला आहे. रविवारी (ता. २५) दुपारी २ च्या सुमारास फिर्यादी व मृत व्यक्‍ती हे कारने जात असताना पंतनगर पोलिस ठाण्याच्या हद्दीत हायवेवर एका अनोळखी दुचाकीस्वाराने गाडी चालवण्यावरून झीशान रफीक शेख याला शिवीगाळ केली. त्यानंतर त्याच्या दुचाकीच्या डिक्कीमध्ये ठेवलेला चाकू काढून तो झीशान रफीक शेखच्या छातीत भोसकून त्याची हत्या केली होती. याबाबत मृतासोबत असलेल्या मित्राने पंतनगर पोलिस ठाणे येथे गुन्हा नोंद केला होता.
मृत झीशान रफीक शेख विक्रोळीतील पार्कसाईट येथे राहतो. तो जुन्या कारच्या विक्रीचा व्यवसाय करतो. रविवारी दुपारी त्याच्या मित्रासोबत तो कारने कुर्ला येथे जात होता. त्‍या वेळी ही घटना घडली.