बळीराजा लागला मॉन्सूनच्या तयारीला

जव्हार, ता. २७ (बातमीदार) : निसर्ग सौंदर्याने नटलेल्या जव्हार तालुक्यातील ८० टक्के नागरिक हे शेतीव्यवसाय करतात. दरम्यान, अवकाळी पावसामुळे सर्वत्र मोठ्या प्रमाणात नुकसान झाले आहे; त्यातच यंदा लवकर पाऊस येणार असल्याने तालुक्यातील बळीराजा शेती मशागतीच्या तयारीला लागला आहे. तसेच बाजारात प्लॅस्टिक, ताडपत्री खरेदीसाठी गर्दी वाढली आहे.

पावसाळा काही दिवसांवर येऊन ठेपला असून, सध्या मॉन्सूनपूर्व पावसाने जव्हार तालुक्यात जोरदार हजेरी लावली आहे. या पार्श्वभूमीवर शेती कामाच्या तयारीला वेग आला असून, पेरणीपूर्व साहित्य खरेदीसाठी बाजारपेठांत मोठी गर्दी दिसून येत आहे. विशेषतः प्लॅस्टिक, ताडपत्रीच्या विक्रीत लक्षणीय वाढ झाली आहे.

ताडपत्रीचा उपयोग शेतकऱ्यांसाठी अतिशय महत्त्वाचा मानला जातो. पेरणीपूर्व टप्प्यात बी-बियाणे व खते शेतात ठेवताना पावसापासून संरक्षणासाठी या ताडपत्रीचा उपयोग केला जातो. याशिवाय जनावरांचे गोठे झाकण्यासाठी, धान्य साठवण्यासाठीदेखील या ताडपत्रीला प्राधान्य दिले जाते. ताडपत्रीच्या वाढत्या मागणीमुळे दुकानदारांची चांगलीच चांदी होत आहे. काही ठिकाणी तर मागणीच्या तुलनेत पुरवठा कमी असल्याने किमतीतही वाढ झाल्याचे चित्र आहे.

बाजारात वेगवेगळ्या आकार व प्रकारातील ताडपत्र्या उपलब्ध आहेत. शेतकरी आपल्या गरजेनुसार निवड करत आहेत. यावर्षीच्या मॉन्सूनबाबत सकारात्मक अंदाज दिला जात असल्याने शेतकरीवर्ग उत्साही आहे. त्याचा परिपाक म्हणून शेतीसाठी लागणाऱ्या साहित्यांची मोठ्या प्रमाणात खरेदी होत आहे. त्यात ताडपत्री हे एक महत्त्वाचे साहित्य आहे. त्याच्या विक्रीतून स्थानिक व्यापाऱ्यांनाही दिलासा मिळत आहे. सध्या शेतकऱ्यांची नजर आकाशाकडे असली तरी ताडपत्रीच्या सहाय्याने त्यांनी आपल्या पिकांचे, जनावरांचे, धान्याचे संरक्षण करण्याचा योग्य विचार केला आहे.

इतर साहित्यखरेदी वाढली
जव्हार तालुक्यात मॉन्सूनपूर्व पावसाला सुरुवात झाल्याने शेतकरी पेरणीपूर्व तयारीला लागले आहेत. त्यामुळे ताडपत्री, बियाणे, खते, किटकनाशके, पाइप, पाण्याच्या टाक्या, प्लॅस्टिक कव्हर, फवारणीची यंत्रे, शेतात वापरण्यात येणारे हातसाचे आणि दोर इत्यादी साहित्याची मागणी मोठ्या प्रमाणात वाढली आहे. पावसापासून संरक्षणासाठी ताडपत्रीला विशेष मागणी आहे. धान्य साठवण, जनावरांचे गोठे झाकणे आणि शेतीसाठी लागणाऱ्या साहित्याच्या सुरक्षिततेसाठी ताडपत्रीचा वापर केला जात आहे. बाजारपेठांत चांगलीच खरेदी सुरू असून, शेतकरीवर्ग तयारीला लागलेला दिसत आहे.

जव्हार: जव्हार शहरात विक्रीसाठी आलेली ताडपत्री व इतर साहित्य.