वासिंद, ता. २९ (बातमीदार): गावातून जाणाऱ्या जुन्या आग्रा रोडच्या काँक्रीटीकरणाचे काम सुरू झाले. निधी अभावी रखडलेल्या रस्त्यावरून प्रवास अतिशय त्रासदायक झाला होता, पण महिनाभरात रस्त्याची कामे पूर्ण होणार असल्याने पाठदुखीतून वासिंदकरांची सुटका होणार आहे.
वासिंद गावातील छत्रपती शिवाजी महाराज चौक ते हॉटेल चक्रधारीपर्यंतचा रस्ता पूर्णपणे उखडून गेला होता. रस्त्याच्या दोन्ही बाजूला असलेल्या दुकानदारांना रस्त्यावर उडणाऱ्या धुळीचा दररोज त्रास सहन करावा लागत होता. अनेकांना श्वसनाच्या विकाराने त्रस्त केले होते. याबाबतचे वृत्त सकाळने वारंवार प्रकाशित करून वासिंदकरांच्या समस्यांचा लेखाजोखा मांडला होता. अखेर दुसऱ्या टप्प्यातील उर्वरित रस्त्याच्या कामाला सुरुवात झाली आहे. महिनाभरात हा रस्ता नागरिकांसाठी खुला करण्यात येणार आहे. महत्त्वाचे म्हणजे, सध्या ड्रीम लँड ते छत्रपती शिवाजी महाराज चौकापर्यंत ५२१ मीटर लांबीच्या नवीन काँक्रीट रस्त्याचे काम पूर्ण करण्यात आले. मुख्य रस्त्यापासून हा रस्ता उंच असल्याने दोन्ही बाजूला साइडपट्टीचे काम अर्धवट असल्याने वाहनचालकांना तसेच खरेदीसाठी येणाऱ्या ग्राहकांना विविध अडचणी येत आहेत.
--------------------------------------
पावसामुळे दुकानदारांमध्ये चिंता
बारा मीटर रुंदीच्या मंजूर रस्त्याच्या दोन्ही बाजूला दीड मीटर रुंदीचे पेव्हरब्लॉक आणि एक मीटर रुंदीची बंदिस्त गटार, दिशादर्शक फलक, फर्निचरचे कामे आजही अपूर्ण आहेत. अशातच पाऊस सुरू झाल्याने बाजारपेठेतील घरांमध्ये तसेच दुकानांमध्ये गटाराचे पाणी शिरण्याचे प्रकार होत आहेत. त्यामुळे सध्या सुरू असलेल्या दुसऱ्या टप्प्यातील काँक्रीटीकरणाच्या कामासोबत साइडपट्टी, गटारांचे काम पूर्ण करण्याची मागणी केली जात आहे.