महाविद्यालयासमोर कचऱ्याचा खच
आराठी ग्रामपंचायतीचे दुर्लक्ष; रोगराई पसरण्याची भीती
श्रीवर्धन, ता. २७ (बातमीदार) : बोर्लीपंचतनकडे जाणाऱ्या मार्गावर श्रीवर्धनजवळील गोखले महाविद्यालयासमोर मोठ्या प्रमाणात प्लॅस्टिक व इतर कचऱ्याचा खच निर्माण झाला आहे. त्यामुळे महाविद्यालयीन विद्यार्थ्यांसह नागरिकांना दुर्गंधीमुळे नाक मुठीत धरून प्रवास करावा लागत आहे. विशेष म्‍हणजे गेल्या काही दिवसांपासून पडलेल्या पावसामुळे परिसरात रोगराई पसरण्याची भीती व्‍यक्‍त केली जात आहे. त्‍यामुळे आराठी ग्रामपंचायतीकडून या कचऱ्याचे नियोजन करण्यात यावे, अशी मागणी नागरिकांकडून केली जात आहे.
बोर्लीपंचतनकडे जाणाऱ्या मार्गावर श्रीवर्धनजवळील गोखले महाविद्यालयासमोर मोठ्या प्रमाणावर वर्दळ असते, मात्र महाविद्यालयाच्‍या गेटसमोर गेल्या काही दिवसांपासून कचऱ्याचा ढिगारा साचला आहे.
नुकत्याच पडलेल्या पावसामुळे रस्त्यालगत असलेला कचरा अस्तावस्त झाल्याने परिसरात दुर्गंधी पसरली आहे. त्‍यामुळे महाविद्यालयातील विद्यार्थ्यांना ये-जा करण्यास अडचण येत आहे. यामुळे प्रशासनाच्या कामकाजावर नाराजी व्‍यक्‍त केली जात आहे. आराठी ग्रामपंचायतीच्या हद्दीत येणाऱ्या या भागात कचराकुंड्यांची कोणतीही व्यवस्था नसल्याने स्थानिक नागरिक थेट रस्त्यालगत कचरा टाकत आहेत. परिणामी परिसरात अस्वच्छता वाढली असून, त्याचा थेट परिणाम विद्यार्थ्यांच्या आरोग्यावर आणि परिसराच्या सौंदर्यावर होत आहे. गोखले महाविद्यालयात रोज शेकडो विद्यार्थी शिक्षणासाठी येतात, मात्र कॉलेज समोरच असणाऱ्या या कचऱ्याच्या ढिगाऱ्यामुळे त्यांना मोठ्या गैरसोयींचा सामना करावा लागत आहे. तसेच या रस्त्याने जाणारे पर्यटक आणि स्थानिक प्रवाशांनाही या दुर्गंधीचा त्रास सहन करावा लागत आहे. ग्रामपंचायतीने याकडे गांभीर्याने लक्ष द्यावे, अशी मागणी विद्यार्थ्यांसह नागरिकांकडून होत आहे.