खारघर, ता. २९ (बातमीदार) : मुसळधार पावसामुळे घोट नदीवरील जुना पूल वाहून गेला आहे. त्‍यात नवीन पुलाचे काम अपूर्ण असल्यामुळे ग्रामस्थांना तळोजा आणि पनवेल गाठण्यासाठी नावडेमार्गे वळसा घालून जावे लागते. त्‍यामुळे वेळ व इंधन खर्ची होत असल्‍याने स्‍थानिकांमधून संताप व्यक्‍त होत आहे.
तळोजा फेज दोन वसाहतीतून घोट नदी आहे. नदीवरील जुना पूल जीर्णावस्‍थेत असल्यामुळे पनवेल महापालिकेच्या माध्यमातून १४ लाख रुपये खर्च करून घोट नदीवरील जुना पुलाच्या बाजूला २४ मीटर लांबीचा नवीन पूल उभारणीचे काम सुरू आहे. घोट ग्रामस्थ तळोजा अथवा पनवेल येथे जाण्यासाठी या पुलाचा तर घोट कॅम्प तसेच तळोजा, भोईर पाडा, पेठाली, तळोजा मजकूर आदी गावातील ग्रामस्थ कल्याण अथवा नावडे एमआयडीसीत ये-जा करण्यासाठी घोट नदीवरील जुन्या पुलाचे उपयोग करतात, मात्र दोन दिवस झालेल्‍या मुसळधार पावसामुळे तळोजा फेज दोनमधून घोट कॅम्पमार्गे घोट गावाकडे जाणाऱ्या नदीवर जुना पूल वाहून गेला. घोट ग्रामस्थांना पनवेल अथवा तळोजा येथे ये-जा करण्यासाठी नावडे मार्गाचा अवलंब करावा लागतो. ग्रामस्थांना तळोजामार्गे ये जा करण्यासाठी नवीन पुलावरील एकेरी मार्ग सुरू करावा, अशी मागणी ग्रामस्थांकडून केली जात आहे. यासंदर्भात कार्यकारी अभियंता संजय कटेकर यांच्याशी संपर्क केला असता होऊ शकला नाही.

-----------------