खोपोली दरडप्रवण खेत्रात आपत्ती व्यवस्थापनाचे मॉक ड्रील
रायगडचे जिल्हाधिकारी किशन जावळे यांचे मार्गदर्शन
खोपोली, ता. २९ (बातमीदार) ः रायगडचे जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष किशन जावळे यांच्या मार्गदर्शनाखाली खालापूर तालुक्यातील तहसीलदार अभय चव्हाण यांच्या आदेशान्वये खोपोली शहरातल्या सुभाष नगर भागातील दरड प्रवण क्षेत्रात नुकतेच मॉक ड्रिल आयोजित करण्यात आले होते.
रायगड जिल्हा आपदा मित्र यंत्रणेचे नोडल अधिकारी एम. के. म्हात्रे यांनी दुपारी साडेतीन वाजता अलर्ट कॉल दिल्यावर अवघ्या पाच मिनिटांत एकामागोमाग एक अशा सर्वच यंत्रणाचे अधिकारी, कर्मचारी आणि जवान आवश्यक संसाधनासह सुभाष नगर परिसरात दाखल झाले. एकीकडे मुसळधार पाऊस आणि सोसाट्याचा वारा सुरू असताना अचानक दाखल झालेल्या सर्व यंत्रणांना पाहून तेथील नागरिक घाबरून हवालदिल झाले होते. त्या वेळी आपत्कालीन यंत्रणांच्या सज्जतेची चाचणी घेण्यासाठी या मॉक ड्रीलचे आयोजन केल्याचे नोडल अधिकारी एम. के. म्‍हात्रे यांनी स्पष्ट केले. या वेळी आपत्कालीन प्रसंगी नागरिकांना सुरक्षेच्या संदर्भात योग्य त्या सूचना देण्यात आल्या. खालापूर तालुका तहसीलदार कार्यालयाकडून महसूल यंत्रणेचे अधिकारी मनोज पवार, खोपोली नगरपालिका प्रशासनाचे उप मुख्याधिकारी रणजीत पवार आणि सर्व खात्यांचे प्रमुख, खोपोली पोलिस स्‍थानकाचे निरीक्षक शितल राऊत आणि अधिकारी, खोपोली नगरपालिका अग्निशमन दलाचे मोहन मोरे आणि जवान, खोपोली नगरपालिकेच्या डॉ. बाबासाहेब आंबेडकर रुग्णालयाच्या आरोग्य अधिकारी डॉ. संगीता वानखेडे आणि आशा वर्कर, सार्वजनिक बांधकाम खात्याचे अधिकारी, म.रा.वि.मचे अधिकारी आणि कर्मचारी, वन खात्याचे अधिकारी, मंडळ अधिकारी भरत सावंत, अपघातग्रस्तांच्या मदतीसाठी सामाजिक संस्थेचे सदस्य त्याचप्रमाणे अन्य संस्थांनी तत्परतेने मॉक ड्रीलमधे सहभाग घेऊन आपले कर्तव्य बजावून हे आपत्कालीन प्रात्यक्षिक यशस्वी केले.