उल्हासनगर, ता. २९ (बातमीदार) : चोरट्यांनी एका दिव्यांग व्यक्तीचे बिअर शॉप फोडून त्यातील १३ बॉक्स लंपास केल्याची घटना उल्हासनगरातील मध्यवर्ती पोलिस ठाण्याच्या हद्दीत घडली आहे. दुकानदार मुकेश बजाज हे दिव्यांग असून, त्यांचे कॅम्प नंबर ३च्या पंजाबी कॉलनी रस्त्यावर बिअर शॉपचे दुकान आहे. सहा महिन्यांपूर्वी या दुकानात चोरी करण्याचा प्रयत्न करण्यात आला होता. पण, चोरी झाली नसल्याने किंवा बिअरचे बॉक्स सुरक्षित असल्याने बजाज यांनी पोलिस ठाण्यात तक्रार दाखल केली नव्हती. मात्र, मंगळवारी रात्री चोरट्यांनी दुकानाचे शटर तोडून १३ बिअरचे बॉक्स घेऊन पसार झाले. ही घटना दुकानात लावलेल्या सीसीटीव्ही कॅमेऱ्यात कैद झाली आहे. याप्रकरणी दुकानदार बजाज यांच्या तक्रारीवरून मध्यवर्ती पोलिस ठाण्यात गुन्हा दाखल केला असून पोलिस चोरट्यांचा शोध घेत आहेत.