अंबरनाथ, ता. २९ (वार्ताहर) : अंबरनाथमध्ये पुन्हा एकदा अमली पदार्थ विक्री करणाऱ्या रॅकेटचा पर्दाफाश करण्यात आला आहे. या वेळी तब्बल एक लाख ३० हजारांचा अमली पदार्थ आढळून आला. ही कारवाई उल्हासनगर गुन्हे शाखेने केली असून, एकाला अटक केली आहे.
अंबरनाथमध्ये राजरोसपणे सुरू असलेल्या अमली पदार्थ विक्रीमुळे भावी पिढी नशेच्या आहारी गेली आहे. झोपडपट्टीमध्ये या पदार्थांची सर्वांत जास्त विक्री होत असल्याचे सामाजिक कार्यकर्ते प्रवीण गोसावी यांनी उघड केले होते. यावर पोलिसांनी अंकुश ठेवावा, यासाठी ते सातत्याने प्रयत्नशील आहेत. अनेकदा त्यांनी अंबरनाथ पोलिसांना याची माहिती दिली होती. अंबरनाथ पश्चिम येथील भगतसिंगनगरमध्ये अमली पदार्थांची विक्री होत असल्याची गुप्त माहिती उल्हासनगर युनिट ४ चे सहाय्यक पोलिस निरीक्षक बांडे यांना मिळाली होती. त्या अनुषंगाने अल्लाबक्ष गुगूडवली शेख (वय ५४) हा व्यक्ती अंबरनाथमध्ये अमली पदार्थ विक्रीसाठी घेऊन येत असल्याची माहिती प्रवीण गोसावी यांनी दिली होती. त्या आधारे वरिष्ठ पोलिस निरीक्षक अशोक कोळी, अंमलदार व पंच यांच्या पथकाने भगतसिंग परिसरात सापळा रचून अगदी शिताफीने ही कारवाई केली आहे. याप्रकरणी शेखला पोलिसांनी ताब्यात घेतले. त्याची झाडाझडती घेतली असता तब्बल एक लाख ३० हजारांचा अमली पदार्थ जप्त करण्यात आला आहे.
यामध्ये सुमारे ९० हजारांचा (१ किलो ४२० ग्रॅम वजनाचा) गांजा, तर ४० हजारांचा (२५ ग्रॅम वजनाचा) चरसचा समावेश आहे. अंबरनाथ पोलिस ठाण्यात आरोपीविरोधात एन.डी.पी.एस. कायद्यांतर्गत गुन्हा दाखल करण्यात आला आहे. ही कारवाई बुधवारी रात्री बडोदा बँकेच्या मागे उल्हासनगर गुन्हे शाखा ४ वरिष्ठ पोलिस निरीक्षक अशोक कोळी यांच्या मार्गदर्शनाखाली सहाय्यक पोलिस निरीक्षक श्रीरंग गोसावी व बबन बांडे, हेड कॉन्स्टेबल चंद्रकांत पाटील, सुरेश जाधव, गणेश गावडे, योगेश वाघ, राजेंद्र थोरवे, पोलिस नाईक विक्रम जाधव, संजय शेरमाळे, रामदास उगले, मनोरमा सावळे यांनी केली.

पारदर्शक कार्यवाही झाल्यास अंबरनाथ शहरातील अमली पदार्थ विकणाऱ्यांचे कंबरडे नक्कीच मोडले जाईल. यापुढेही कारवाई व माझा लढा सुरूच राहील. कारवाईबाबत पोलिस आयुक्त, ठाणे तसेच गुन्हे शाखा उल्हासनगर ४ यांचे आभार मानले आहेत.
- प्रवीण गोसावी, सामाजिक कार्यकर्ते