पालघर, ता. २९ (बातमीदार) : केळवे-माहीम परिसरातील टोकराळे येथे टेक्स्टाइल पार्क उभारण्याचे प्रस्तावित आहे. या प्रकल्पाला स्थानिकांकडून कडाडून विरोध होत आहे. नागरिकांना विश्वासात न घेता हा प्रकल्प उभा राहत असल्याने याविरोधात रविवारी (ता. १ जून) आंदोलन करण्यात येणार आहे. माहीम, केळवे, कमारे व परिसराच्या नागरिकांसह या पार्कविरोधात उभी केलेली पर्यावरण दक्षता संयुक्त समितीच्या नेतृत्वाखाली हे आंदोलन केले जाणार आहे.

टोकराळे येथील हा प्रकल्प प्रदूषणकारी असून सातपाटी ते दातिवरे या हरितपट्ट्याला नष्ट करेल, अशी भीती स्थानिकांकडून वर्तवली जात आहे. केळवे, माहीम ही पर्यटनस्थळे या प्रकल्पाच्या प्रदूषणातून बाधित होतील व नैसर्गिक सौंदर्य धोक्यात येण्याची शक्यता आहे. तसेच रासायनिक पाणी जलस्रोतांमध्ये जाऊन मानवी आरोग्यही धोक्यात येण्याची शक्यता आहे. एका बाजूला येथील समृद्ध प्रदेश हरितपट्टा म्हणून घोषित करायचा आणि दुसरीकडे प्रदूषणकारी प्रकल्प त्याच पट्ट्यात लादायचे, अशी दुटप्पी भूमिका सरकार घेत आहे, असा दावा होत आहे. रविवारी सायंकाळी चार वाजता केळवा-माहीम खाडीच्या पुलावर एकत्रित जमून टोकराळे येथील प्रस्तावित प्रकल्पाच्या जागेवर जाऊन आंदोलन करून विरोध दर्शवला जाणार आहे. प्रकल्पाच्या सर्वेक्षणासाठी कंपनीने परवानगीची मागणी केळवे ग्रामपंचायतीकडे केली होती. सरपंच संदीप किणी यांच्या अध्यक्षतेखाली विशेष ग्रामसभेचे आयोजन करण्यात आले होते. या सभेत एकमताने टेक्स्टाइल पार्क आणि सर्वेक्षणाला विरोध केला होता.