एक धाव वीज सुरक्षेसाठी!
कल्याण परिमंडलात मॅरेथॉनद्वारे सुरक्षा सप्ताहाचा उत्साहात प्रारंभ
कल्याण, ता. १ (वार्ताहर) ः महावितरणच्या २०व्या वर्धापन दिनानिमित्त ‘शून्य अपघात महावितरण, शून्य अपघात महाराष्ट्र’ ही संकल्पना घेऊन १ ते ६ जूनदरम्यान राज्यभरात वीज सुरक्षा सप्ताहाचे आयोजन केले आहे. त्यानुसार कल्याण परिमंडलात रविवारी (ता. १) सकाळी मॅरेथॉनच्या सुरक्षा सप्ताहाचा प्रारंभ करण्यात आला. ‘आम्ही सुरक्षेचे शिल्पकार, शून्य अपघाताने करू महावितरणचे ध्येय साकार’ हे ब्रीद घेऊन वीज सुरक्षेबाबत जनजागृती करीत निघालेल्या कर्मचारी, अधिकाऱ्यांच्या मॅरेथॉनचे नेतृत्व कल्याण परिमंडलाचे मुख्य अभियंता चंद्रमणी मिश्रा यांनी केले.
महावितरणचा २०वा वर्धापन दिन शुक्रवारी (ता. ६) साजरा होत आहे. यानिमित्ताने सप्ताहात वीज सुरक्षेला सर्वोच्च प्राधान्य देत विविध उपक्रम आयोजित केले आहेत. कल्याण परिमंडल कार्यालयाच्या प्रांगणातून रविवारी सकाळी ८ वाजता कर्मचारी, अधिकाऱ्यांच्या सहभागातून आयोजित मॅरेथॉनला सुरुवात झाली. वीज सुरक्षेबाबत फलक हाती घेत व घोषणा देत ही मॅरेथॉन प्रेम ऑटो चौकापर्यंत पोहोचली. वीज सुरक्षेचा जागर करीत ‘रन फॉर सेफ्टी’ हे घोषवाक्य घेऊन निघालेल्या मॅरेथॉनचा समारोप परिमंडल कार्यालयाच्या प्रांगणात झाला.
या मॅरेथॉनमध्ये वाशी मंडल कार्यालयाचे अधीक्षक अभियंता दीपक पाटील, मुख्यालयातील वितरण विभागाचे अधीक्षक अभियंता नितीन काळे, कल्याण मंडल-२चे अधीक्षक अभियंता विजय फुंदे, उपमुख्य जनसंपर्क अधिकारी अजित इगतपुरीकर, उपमुख्य औद्योगिक संबंध अधिकारी रामगोपाल अहिर, कार्यकारी अभियंते कौमुदी परदेशी, देबाशिश दत्ता, मिलिंद चौधरी, जगदीश बोडखे, मनीष ढाकरे, वरिष्ठ व्यवस्थापक योगेश अमृतकर यांच्यासह उपविभागीय, शाखा अभियंते, कर्मचारी व अधिकारी मोठ्या संख्येने उपस्थित होते.