झेप्टोने दूध पावडरऐवजी पीठ पाठवले
मनसे आक्रमक; पोलिसांच्या मध्यस्थीने प्रकरण निवळले
धारावी, ता. १ (बातमीदार) : सनी कोळी यांनी शुक्रवारी (ता. ३०) धारावीतील झेप्टोच्या गोडाऊनमधून ऑनलाइन फूड (नेस्ले दूध पावडर) मागविले होते. सहा महिन्यांच्या बाळासाठी दूध पावडर मागवली असता, त्यामध्ये दूध पावडर नव्हे तर पीठ देण्यात आले होते. त्या डब्यावर मुदत संपलेली तारीखही होती. तो डबा बंदही करण्यात आला नव्हता. ही घटना धारावीतील महाराष्ट्र नवनिर्माण सेनेचे उपविभाग अध्यक्ष कौशिक शांताराम कोळी यांना समजल्यानंतर संत रोहिदास मार्गावरील गोल्ड फिल्ड येथील झेप्टोच्या गोडाऊनमध्ये जात त्यांना जाब विचारण्यात आला. या वेळी झेप्टोकडून उडवाउडवीची उत्तरे देण्यात असल्याने वातावरण तापले होते. या वेळी गोडाऊनमध्ये कचरा व घाण पसरलेली होते. या वेळी पोलिसांनी मध्यस्थी करून हे प्रकरण शांत केले. त्यानंतर अन्न व औषधे विभागाचे अधिकारी घटनास्थळी पोहोचले. त्यांनी गोडाऊनची पाहणी करून पुढील कार्यवाही सुरू केली आहे.
या प्रकरणाचा धारावी पोलिस अधिक तपास करीत आहेत.
शाखाध्यक्ष संदीप कदम यांनी सांगितले, की कोणतेही साहित्य ऑनलाइन मागविताना नीट काळजी घेऊन आणि पाहणी करूनच ती ताब्यात घ्या, असे आवाहन त्यांनी नागरिकांनी केली.
या वेळी कौशिक कोळी, समीर भोईटे, भक्ती तिखे, सुरेखा भगत, द्रोणालमी सोनवणे, रोहन कांबळे, संतोष माने, यश, महेश, श्रुती दामोदर ताई तसेच मनसैनिक उपस्थित होते.