भूमिगत कचरापेटीच कचऱ्याच्या विळख्यात
दुर्गंधीचा त्रास कायम

घाटकोपर, ता. १ (बातमीदार) : रस्त्यावर असणाऱ्या कचरापेट्यांमुळे होणारी दुर्गंधी, अस्वच्छ परिसरामुळे वाढणारी रोगराई टाळण्यासाठी वर्षभरापूर्वी मुंबई महापालिकेने शहरात भूमिगत कचरापेट्या बसवल्या आहेत. दरम्यान, या भूमिगत कचरापेट्यांची योग्य पद्धतीने देखभाल होत नसल्याने भूमिगत कचरापेट्याच कचऱ्याच्या विळख्यात सापडल्या आहेत. त्यामुळे नागरिकांना दुर्गंधीचा त्रास होत आहे.
शहरात अनेक ठिकाणी पालिकेने उघड्या कचरापेट्या बसवल्या आहेत. दरम्यान, या पेट्यांतील जमा होणाऱ्या कचऱ्यामुळे परिसरात घाण आणि दुर्गंधीचे साम्राज्य पसरले आहे. त्याचा परिणाम नागरिकांच्या आरोग्यावर होत आहे.
-----------------------------
वापर नाही
घाटकोपर पश्चिममध्ये पालिकेने भटवाडी आणि जगदुशानगर भागात भूमिगत कचरापेट्या बसवल्या आहेत. या भूमिगत कचरापेट्याच आता कचऱ्याच्या विळख्यात सापडल्या आहेत. परिसरातून कचरा जमा करणारे सफाई कर्मचारीदेखील कचरा थेट पेटीत न टाकता जमिनीवर टाकत आहेत. त्यामुळे लाखो रुपये खर्च करून दुर्गंधी टाळण्यासाठी बांधण्यात आलेल्या भूमिगत कचरापेट्याचा वापर होताना दिसत नाही.
---------------------------
प्रतिक्रिया
पालिकेने शहरात बसवलेल्या भूमिगत कचरापेट्या या निरुपयोगी ठरत आहेत. या पेट्यांमध्ये पावसाचे पाणी साचत आहे. योग्य देखरेख होत नसल्याने त्यांची दुरवस्था झाली आहे. त्यामुळे नागरिक पुन्हा रस्त्यावर कचरा फेकत आहेत.
- ॲड. अमोल मातेले, राष्ट्रवादी युवक काँग्रेस पवार गट, मुंबई अध्यक्ष
-----------------------------
शहर स्वच्छ आणि दुर्गंधीमुक्त ठेवण्याच्या नावाखाली लाखो रुपये खर्च करून बांधण्यात आलेल्या भूमिगत कचरापेट्यांचा वापर योग्यरीत्या होत नाही. या पेट्या नागरिकांच्या उपयोगाऐवजी अधिक त्रासदायक ठरत आहेत. पालिका आयुक्तांनी याकडे लक्ष्य दिले पाहिजे.
- प्रकाश वाणी, शिव आरोग्य सेना, मुंबई जिल्हा सहसमन्वयक