‘महाप्रीत’चा ‘एनएलसी इंडिया’सोबत करार
मुंबई : महात्मा फुले रिन्यूएबल एनर्जी ॲण्ड इन्फ्रास्ट्रक्चर टेक्नाॅलाॅजी लिमिटेड (महाप्रीत) ही राज्य सरकारच्या मालकीची वीज कंपनी एनएलसी इंडिया रिन्यूएबल लिमिटेडच्या माध्यमातून राज्यात तब्बल पाच हजार मेगावाॅटचे अपारंपरिक ऊर्जा प्रकल्प उभारणार आहे. दोन्ही कंपन्यांनी याबाबत करार केला आहे. त्यामुळे भविष्यात राज्यात प्रदूषणरहित अपारंपरिक ऊर्जा मोठ्या प्रमाणात उपलब्ध होणार आहे. वाढत्या प्रदूषणाच्या पार्श्वभूमीवर दिवसोंदिवस सौर, पवन ऊर्जा प्रकल्पांच्या उभारणीला राज्य सरकारकडून चालना दिली जात आहे. त्याचाच भाग म्हणून महाप्रीतने पाच हजार मेगावाॅट क्षमतेचे वीज प्रकल्प उभारण्याचे नियोजन केले आहे. पहिल्या टप्प्यात दोन हजार मेगावाॅटचे प्रकल्प असणार आहेत. त्यामध्ये सौर, पवन, फ्लोटिंग सोलर, उदंचन जलविद्युत प्रकल्पांचा समावेश असणार आहे. या वीज प्रकल्पातून वीजनिर्मिती सुरू झाल्यानंतर वीज वितरण कंपन्यांना आपले अपारंपरिक वीज वापराचे उद्दिष्ट पूर्ण करण्यासाठी पुरेशी वीज उपलब्ध होईल.