महाविकास आघाडीचे टीओडी मीटर सक्ती करणाऱ्या महावितरणविरोधात आंदोलन
आंदोलकांचा रोष बघून अधिकाऱ्यांनी मीटर सक्ती नसल्याचे स्पष्ट केले
गौतम अदाणीच्या फोटोला मारले जोडे!
बदलापूर, ता. २ (बातमीदार) ः शहरात टीओडी या नव्या मीटर प्रणाली बसवण्याबाबत ग्राहकांना केली जाणारी सक्ती आणि त्यातही ग्राहकांना न कळवताच परस्पर मीटर बदलण्याचे अदाणी कंपनीकडून सुरू असलेल्या प्रकाराबाबत महाविकास आघाडीने रोष व्यक्त केला. अदाणी कंपनी आणि महावितरणविरोधात बदलापुरातील महाविकास आघाडीने एकत्र येत जोरदार निदर्शने केली.
बदलापूर शहरात महावितरणकडून कोणतीही परवानगी न घेता डिजिटल मीटर लावले जात आहेत. या डिजिटल मीटरमुळे अव्वाच्या सव्वा बिल नागरिकांना येत आहे. अनेक इमारतींना हे मीटर बसवण्यासाठी सक्ती करण्यासंदर्भात पत्रदेखील दिले जात आहेत. त्यामुळे या डिजिटल मीटरची सक्ती महावितरणने शहरात करू नये व हे मीटर बसवण्याचा ठेका ज्या अदाणी कंपनीला देण्यात आला आहे, त्या कंपनीच्या कर्मचाऱ्यांची ग्राहकांवरील मुजोरी सहन करणार नाही, असा इशारा देत बदलापूर पूर्वेकडील महावितरण कार्यालयावर महाविकास आघाडीने धडक मोर्चा काढला.
या वेळी मुख्यमंत्री देवेंद्र फडणवीस आणि गौतम अदाणी यांच्या फोटोचे तोरण बनवून ते महावितरणच्या कार्यालयात लावण्यात आले, शिवाय गौतम अदाणी यांच्या फोटोला महाविकास आघाडीच्या कार्यकर्त्यांनी जोडे मारत आपला रोष व्यक्त केला. महाविकास आघाडीच्या कार्यकर्त्यांनी यावेळेस राज्य सरकारविरोधात घोषणा दिल्या. या आंदोलनाला सामोरे जाण्यासाठी महावितरणचा एकही अधिकारी जागेवर नव्हता. या वेळी सर्वसामान्य ग्राहकांनीसुद्धा या नव्या मीटरसाठी तीव्र नाराजी दर्शवली.
आता यापुढे बदलापूर शहरात महावितरणकडून डिजिटल मीटरसाठी सक्ती करण्यात आली, तर डिजिटल मीटर लावायला येणाऱ्यांना चोप दिला जाईल आणि ते मीटर फोडले जातील.
- अविनाश देशमुख, प्रदेश सरचिटणीस, राष्ट्रवादी काँग्रेस शरद पवार गट
मुख्यमंत्र्यांकडे ऊर्जा खाते आहे. त्यांना सामान्य लोकांचे हाल दिसत नाहीत. हे सत्ताधारी अदाणीचे दलाल आहेत. अदाणी कंपनीकडून केली जात असलेली मीटर सक्ती शासनाने त्वरित थांबवावी अन्यथा आम्ही हे मीटर फोडून टाकू.
- किशोर पाटील, शहरप्रमुख, उद्धव बाळासाहेब ठाकरे पक्ष
आम्ही यापुढे ग्राहकांना या नव्या मीटरसाठी कोणतीही सक्ती करणार नाही व ग्राहकांची परवानगी घेतल्याशिवाय हे डिजिटल मीटर लावले जाणार नाहीत.
- आनंद काटकर, कार्यकारी अभियंता महावितरण
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.