पालिकेच्या सफाई कर्मचाऱ्यावर हल्ला
सात ते आठ जणांच्या टोळीचा थरार
उल्हासनगर, ता. २ (वार्ताहर) : शहरातील कॅम्प क्र. २ मधील भैयासाहेब आंबेडकर नगर येथे महापालिकेच्या सफाई कर्मचाऱ्यावर शस्त्राने हल्ला करीत सात ते आठ जणांच्या टोळीने बेदम मारहाण केल्याची धक्कादायक घटना घडली आहे. या हल्ल्यात सफाई कर्मचारी गंभीर जखमी झाला असून, शहरातील सुरक्षेवर मोठा प्रश्नचिन्ह निर्माण झाला आहे.
प्राथमिक माहितीनुसार, पवन ढकोलिया असे सफाई कर्मचाऱ्याचे नाव आहे. तो उल्हासनगर महापालिकेच्या सफाई विभागात कार्यरत आहे. सोमवारी (ता. २) दुपारी जेवणासाठी घरी आल्यावर पुन्हा कामावर जात असताना त्याच्यावर अचानक टोळक्याने हल्ला चढवला. या हल्ल्यात पवनच्या डोक्यावर धारदार शस्त्राने हल्ला करण्यात आला असून, तो गंभीर जखमी झाला आहे. तातडीने त्याला उल्हासनगरच्या मध्यवर्ती शासकीय रुग्णालयात दाखल करण्यात आले आहे. याप्रकरणी सात ते आठ जणांचे टोळके असल्याचे स्थानिकांनी सांगितले. या हल्ल्याचे नेमके कारण अद्याप स्पष्ट झाले नसले, तरी पूर्वीच्या वादातून ही घडना घडल्याचा संशय व्यक्त केला जात आहे.
घटनेची माहिती मिळताच उल्हासनगर पोलिस ठाण्याचे अधिकारी घटनास्थळी दाखल झाले असून, आरोपींविरुद्ध गुन्हा दाखल करण्याची प्रक्रिया सुरू आहे. या प्रकारामुळे परिसरात भीतीचे वातावरण निर्माण झाले आहे. आरोपींना त्वरित अटक करून अशा गुन्हेगारी प्रवृत्तींना रोखण्यासाठी कारवाई करण्यात यावी, अशी मागणी स्थानिक नागरिकांनी केली आहे.