आषाढी वारीत सायकल ग्रुपची सेवा
सकाळ वृत्तसेवा
डोंबिवली, ता. ५ : डोंबिवली एमआयडीसीतील ज्येष्ठ नागरिक महिलांसह इतर २५ ते ५० वयोगटातील महिला, पुरुष, तरुण सायकलपटू या महिन्यात डोंबिवलीतून सायकलवरून पंढरपूरच्या आषाढी वारीसाठी जाणार आहेत. या सायकलपटूंनी वाटेत वारकऱ्यांची आरोग्यसेवा करण्याचा आणि इतर सेवा देण्याचा निर्णय घेतला आहे.

मंगळवारी (ता. ३) आंतरराष्ट्रीय सायकलदिनानिमित्त डोंबिवली एमआयडीसीत महिला सायकलपटू एकत्र आल्या होत्या. या वेळी सायकलदिनानिमित्त त्यांनी एमआयडीसीतील विविध रस्त्यांवर सायकल चालवून सराव केला. तसेच या सायकल फेरीच्या माध्यमातून पाणीबचत, पर्यावरण संवर्धन, सुदृढ आरोग्यासाठी आरोग्य आणि व्यायामाचा संदेश नागरिकांना दिला. या सायकल गटात साठ ते सत्तर वयोगटातील ज्येष्ठ नागरिक महिला आहेत, याशिवाय ४० ते ५० वयोगटातील महिलांचाही सहभाग आहे. काही पुरुष, तरुण मुले या ग्रुपच्या माध्यमातून विविध उपक्रम राबवितात.

डोंबिवली एमआयडीसीतील ४२ जणांच्या सायकल ग्रुपने पंढरपूरच्या आषाढी वारीत सहभागी होण्याचा निर्णय घेतला आहे. १८ जूनला हा ग्रुप सायकलवरून पंढरपूरच्या दिशेने वारीसाठी निघेल. वाटेत वारकऱ्यांना खाऊचे वाटप, आरोग्य तपासणी असे उपक्रम ते राबविणार आहेत. या सायकल ग्रुपच्या माध्यमातून डोंबिवली शहर परिसरातील नागरिकांना वारकऱ्यांच्या सेवेसाठी काही मदत करायची असेल, तर त्यांनी या सायकल गटातील महिलांसाठी संपर्क साधण्याचे आवाहन केले आहे. हर्षल सरोदे, सुवर्णा राणे, सरोज विश्वामित्रे, कल्पना बोंडे हे ४२ जणांच्या सायकल गटाचे नेतृत्त्व करत आहेत. या सायकल ग्रुपने सोबत बस, रुग्णवाहिका, टेम्पो आणि आवश्यक सामग्री ठेवण्याचा निर्णय घेतला आहे.

संपर्क साधण्याचे आवाहन
आषाढी वारीतील सेवेनंतर २२ जून रोजी हा सायकल ग्रुप पुन्हा डोंबिवलीच्या दिशेने माघारी येणार आहे. वारीतील वारकऱ्यांच्या सेवेसाठी कोणाही नागरिकाला काही सहाय्य करायचे असेल, तर त्यांनी हर्षल सरोदे किंवा शुभम उदबत्ती स्टॉल, कावेरी चौक, एमआयडीसी, डोंबिवली पूर्व येथे संपर्क साधावा, असे आवाहन सायकल ग्रुपने केले आहे.