खारघर, ता. ९ (बातमीदार) : दिल्लीमध्ये आयोजित करण्यात आलेल्या नॅशनल पॉवरलिफ्टिंग चॅम्पियनशिप स्पर्धेत खारघरमधील शुभम भोईर याने ७४ किलो वजनी गटात रौप्यपदक प्राप्त केले. इंडियन पॉवरलिफ्टिंग फेडरेशनच्या वतीने दिल्ली येथील माँ आद्यशक्ती मंदिर रोहिणी येथे २९ मे ते १ जूनदरम्यान दिल्ली नॅशनल पॉवरलिफ्टिंग ज्युनिअर, सबज्युनिअर चॅम्पियन स्पर्धेचे आयोजन करण्यात आले होते. या स्पर्धेत महाराष्ट्र, पंजाब, हरियाना, उत्तर प्रदेश, ओरिसा अशा विविध राज्यांतील स्पर्धक सहभागी झाले होते. या स्पर्धेत खारघरमधील २३ वर्षीय शुभम आदेश भोईर याने ७४ किलो वजनी गटात रौप्यपदकावर नाव कोरले. मागील महिन्यात उरण जेएनपीए येथे पार पडलेल्या राज्यस्तरीय पॉवरलिफ्टिंग स्पर्धेत शुभम भोईरने ७४ किलो वजनी गटात दोन सुवर्ण, चार रौप्य आणि एक कांस्यपदक प्राप्त केले आहे.