जव्हार (बातमीदार) : आमदार हरिश्चंद्र भोये यांच्या वाढदिवसानिमित्त राजीव गांधी स्टेडियमशेजारी राधा विद्यालय परिसरात रक्तदान शिबिर आणि आरोग्य तपासणी शिबिराचे आयोजन करण्यात आले आहे. या वेळी ३२ रक्तदात्यांनी रक्तदान केले, तर शेकडो नागरिकांनी विविध आरोग्य तपासण्या करून घेतल्या. या शिबिरादरम्यान काही रुग्णांना मोफत शस्त्रक्रिया करण्यासाठी पोशेरी हॉस्पिटल येथे पाठविण्यात आले. शिबिराचे नेतृत्व आयडियल फाउंडेशनच्या संचालिका चहक जैन आणि वंश जैन यांनी केले. डॉ. जगदीश भवानी आणि त्यांच्या तज्ज्ञ पथकाने नागरिकांच्या विविध तपासण्या करून वैद्यकीय मार्गदर्शन केले. या कार्यक्रमास महाराष्ट्र प्रदेश सरचिटणीस माधवी नाईक, खासदार डॉ. हेमंत सवरा, भाजप पालघर जिल्हाध्यक्ष भरत राजपूत, तालुका अध्यक्ष व पक्षाचे विविध पदाधिकारी, कार्यकर्ते उपस्थित होते.