यंत्रसामग्री पुरवणाऱ्या मध्यस्थाला सत्र न्यायालयाकडून जामीन
मिठी नदीतील गाळ काढण्याशी संबंधित घोटाळा
सकाळ वृत्तसेवा
मुंबई, ता. ८ ः जवळपास ६५ कोटी रुपयांहून अधिकच्या मिठी नदी गाळ काढण्याशी संबंधित घोटाळ्याप्रकरणी अटकेत असलेल्या मध्यस्थाला गुरुवारी (ता. ५) सत्र न्यायालयाने जामीन मंजूर केला. अतिरिक्त सत्र न्यायाधीश एन. जी. शुक्ला यांनी अर्जदार जय जोशी यांना एक लाख रुपयांच्या वैयक्तिक मुचलक्यावर जामीन मंजूर केला. दंडाधिकारी न्यायालयाने मागील महिन्यात जामीन फेटाळल्यानंतर जोशीने जामिनासाठी सत्र न्यायालयात धाव घेतली होती.
मुंबई महापालिकेशी जोशींचा थेट संबंध नसून या घोटाळ्यात त्यांना गोवण्यात आले आहे. जोशी हे फक्त एक मशीन पुरवठादार होते आणि त्यांनी नेदरलँड्समधून मशीन्स आयात केल्या होत्या, असा युक्तिवाद जोशींच्या वतीने वकील युसूफ इक्बाल आणि झैन श्रॉफ यांनी केला. तसेच, जोशी यांना जामीन मंजूर करण्याची विनंती केली. मार्च-एप्रिल २०२१ मध्ये जोशी यांनी मशीन्स खरेदी करण्यासाठी आठ कोटी रुपयांहून अधिक पैसे मोजले होते आणि त्यानंतर खासगी भाडेपट्टा कराराद्वारे मशीन कंत्राटदारांना भाडेपट्ट्यावर दिल्याचा दावाही जोशी यांच्या वतीने युक्तिवाद करण्यात आला.
या प्रकरणाचा तपास प्राथमिक टप्प्यात आहे आणि कागदोपत्री पुरावे गोळा करण्याचे काम सुरू आहे. अर्जदाराला जामीन मंजूर झाला तर तो तपासात अडथळे निर्माण करू शकतो, असा प्रतिदावा करून सरकारी वकिलांनी जोशी यांच्या जामीन अर्जाला विरोध केला. दोन्ही बाजूंचा युक्तिवाद थोडक्यात ऐकल्यानंतर न्यायालयाने जोशी यांची विनंती मान्य करून जामीन मंजूर केला.

घोटाळा काय?
आर्थिक गुन्हे शाखेच्या आरोपांनुसार, जय जोशी आणि अन्य एकाने मुंबई महानगरपालिकेच्या कोची येथील कंपनी मॅटप्रॉप टेक्निकल सर्व्हिसेस या कंपनीच्या गाळपुशर मशीन आणि ड्रेजिंग उपकरणे भाड्याने देण्यासाठी अधिकची रक्कम आकारली. त्यानंतर मॅटप्रॉपच्या उपकरणांच्या वैशिष्ट्यांचा समावेश असलेल्या निविदा काढल्या. त्यानुसार, कोणत्याही कंत्राटदाराला फक्त कंपनीच्या मशीन्स खरेदी कराव्या किंवा भाड्याने घ्याव्या लागणार होत्या. अशी उपकरणे तयार करणारी मॅटप्रॉपही देशातील एकमेव उत्पादक कंपनी असल्याने महापालिकेच्या या निविदेमुळे कंपनीला मक्तेदारी मिळाली. या घोटाळ्यात कंपनीचे संचालक दीपक मोहन हेही आरोपी आहेत. निविदेनंतर, कंत्राटदारांनी मॅटप्रॉपशी संपर्क साधला तेव्हा त्यांना जोशी यांच्याकडे पाठवण्यात आले. त्यांनी आणि साथीदाराने मोहन यांच्याशी संगनमत करून चढ्या दराने उपकरणे भाड्याने दिल्याचा आरोप आहे.
....