टीओडी मीटरला विरोध
अंबरनाथमध्ये काँग्रेसचे आंदोलन
अंबरनाथ, ता. ६ (वार्ताहर) : केंद्र शासनाच्या आरडीएसएस या योजनेअंतर्गत टीओडी मीटरजोडणीचे काम सध्या शहरभर सुरू आहे. अंबरनाथमधील नागरी आणि रहिवासी सोसायट्यांमध्ये ही मीटरजोडणी सक्तीने सुरू आहे. शासनाच्या या टीओडी मीटरला विरोध करत अंबरनाथमध्ये काँग्रेसचे शहर अध्यक्ष कृष्णा रसाळ पाटील यांच्या नेतृत्वाखाली शुक्रवारी (ता. ६) आंदोलन करण्यात आले. या वेळी काँग्रेसचे जनरल सेक्रेटरी रोहित कुमार प्रजापती, नंदू देवडे, महिला सचिव अनिता जाधव-प्रजापती तसेच पदाधिकारी कार्यकर्ते आणि नागरिक मोठ्या संख्येने उपस्थित होते.
दरम्‍यान, कृष्णा पाटील यांनी महावितरणाच्या कार्यकारी अभियंता अलका कावले यांची भेट घेत त्यांना टीओडी मीटर सक्तीने लावण्यात येऊ नये यासाठी निवेदन दिले.

का आहे विरोध?
नवीन आरडीएसएस योजनेअंतर्गत टीओडी मीटरजोडणी सुरू आहे. यामध्ये वीजबिल न भरल्यास वीजपुरवठा तत्काळ खंडित केला जाईल. यामुळे सर्वसामान्य नागरिकांना बिल भरण्यासाठी जो काही कालावधी मिळायचा तो अजिबात मिळणार नसून कोणत्याही परिस्थितीत बिल भरणे अनिवार्य राहील. तसेच जुन्या मीटरप्रमाणे ग्राहकांच्या खिशाला न परवडणारे हे बिल दुपट्ट तिप्पट असणार आहे. त्यामुळे सर्वसामान्य ग्राहकांना याचा आर्थिक भुर्दंड पडणार असून, अनेक समस्यांना सामोरे जावे लागेल. ही नागरिकांची, ग्राहकांची गळचेपी ठरेल. म्हणून आज हे निषेध आंदोलन करण्यात आल्याचे काॅंग्रेसने म्हटले आहे.