डोंबिवलीतील रस्त्यांवर राडारोडा
सकाळ वृत्तसेवा
डोंबिवली, ता. ७ : एमआयडीसी परिसरातील बसस्टॉपजवळील भाजीगल्ली परिसर सध्या दयनीय अवस्थेत आहे. येथे एमआयडीसी प्रशासनामार्फत नवीन गटाराचे खोदकाम सुरू आहे; मात्र हे काम अत्यंत संथगतीने सुरू आहे. त्यामुळे नागरिकांचे प्रचंड हाल होत आहेत. गटाराच्या खोदकामानंतर माती, राडारोडा रस्त्यावरच पडून आहे. त्यातच सतत कोसळणाऱ्या पावसामुळे संपूर्ण रस्ता चिखलमय आणि निसरडा झाला आहे. त्यामुळे ज्येष्ठ नागरिक, लहान मुले, तसेच दुचाकीस्वारांना मोठ्या त्रासाला सामोरे जावे लागत आहे.

ज्येष्ठ नागरिकांना इमारतीत प्रवेश करताना तात्पुरत्या लाकडी फळ्यांवरून कसरत करीत जावे लागत आहे. यामुळे अपघातांची शक्यता अधिक वाढली आहे. स्थानिक नागरिक तसेच माजी नगरसेवक भालचंद्र म्हात्रे, शिवसेना शाखाप्रमुख सागर पाटील आणि राजू नलावडे यांनी संबंधित विभागांकडे रस्त्याचे तत्काळ काँक्रीटीकरण करावे, अशी वारंवार मागणी केली आहे.

निवडणुकीवर बहिष्कार टाकणार
मागील वर्षी याच भागातील नागरिकांनी काँक्रीट रस्त्यासाठी मूक आंदोलन करून प्रशासनाचे लक्ष वेधण्याचा प्रयत्न केला होता; मात्र अद्याप कोणतीही ठोस कारवाई झालेली नाही. या समस्यांकडे वारंवार दुर्लक्ष होत असल्यामुळे स्थानिक नागरिकांमध्ये तीव्र नाराजी निर्माण झाली आहे. जर लवकरात लवकर रस्ता काँक्रीटचा केला नाही, तर आम्ही आगामी कल्याण-डोंबिवली महापालिका निवडणुकीवर बहिष्कार टाकू, असा इशारा रहिवाशांनी दिला आहे.