घाटकोपरमधील कचरा हटवला
घाटकोपर, ता. ७ (बातमीदार) ः घाटकोपरच्या भटवाडी, जगदुशानगरमध्ये मोठ्या प्रमाणात कचरा साचला होता. यासंदर्भात ‘सकाळ’च्या शुक्रवारच्या (ता. ६) अंकामध्ये वृत्त प्रकाशित करण्यात आले होेते. याची दखल घेत पालिकेने येथील कचरा उचलला असून रहिवाशांची दुर्गंधीपासून सुटका झाली आहे.
येथील भूमिगत कचरापेटीभोवती कचरा साचला हाेता. एन वॉर्डमधील उपायुक्त संतोष कुमार धोंडे , सहाय्यक आयुक्त गजानन बेल्लाळे यांच्या मार्गदर्शनाखाली घनकचरा व्यवस्थापनाचे सहाय्यक अभियंता किरणसिंह पाटील यांनी भूमिगत कचरापेटीची स्वच्छता केली. कचरापेटीच्या भोवतालचा संपूर्ण कचरा उचलण्यात आला. घाणीने माखलेली कचरापेटी पाण्याने स्‍वच्छ करण्यात आली.
रस्त्यावरील कचरापेट्यांमुळे दुर्गंधी, अस्वच्छ परिसरामुळे वाढणारी रोगराई टाळण्यासाठी वर्षभरापूर्वी महापालिकेने शहरात भूमिगत कचरापेट्या बसवल्या आहेत; मात्र या भूमिगत कचरापेट्यांची व्यवस्थित निगा राखली जात नसल्याने या कचरापेट्याच कचऱ्याच्या विळख्यात सापडल्या आहेत.