कांदिवलीत वृक्ष छाटणीच्या फांद्यांचे रस्त्यावर ढिगारे
वाहनचालकांसह प्रवासी हैराण : पावसात पालापाचोळ्याचा गाळ
कांदिवली, ता. ७ (बातमीदार) : कांदिवली पश्चिमेला पालिकेने केलेल्या वृक्ष छाटणीचे आणि गटारातील कचऱ्याचे ढिगारे पाच दिवसांपासून रस्त्यावर पडून आहेत. हे ढिगारे मुख्य मार्गांवर, पदपथावर, बस थांबा अशा महत्त्वाच्या ठिकाणी असल्याने वाहनचालकांसह प्रवासी आणि स्थानिक नागरिकांना नाहक त्रास सहन करावा लागत आहे. पालिकेने तातडीने फांंद्या, पालापाचोळा, चिखल गाळाचे ढिगारे उचलून मार्ग, पदपथ मोकळे करावे, अशी मागणी प्रवाशांसह नागरिकांकडून केली जात आहे.
पालिकेच्या कामात सुसूत्रता नसल्याने त्यात पावसाने लवकर आगमन केल्याने नागरिकांसह वाहनचालक आणि प्रवाशांना प्रचंड मानसिक त्रासाला सामोरे जावे लागत आहे. खोदकामे, गटारे आणि रस्त्याच्या कामात वाहतुकीची कोंडी, जागोजागी मार्गातील अडथळे यामुळे नागरिक कमालीचे त्रस्त असताना कांदिवली पश्चिमेला महात्मा गांधी मार्ग, शांतीलाल मोदी मार्ग मुख्य मार्गासह पदपथावर, इमारतींच्या गेटसमोर, बस थांब्यांच्या आजूबाजूला वृक्ष छाटणी केलेल्या फांद्यांचे आणि पालापाचोळ्याचे ढिगारे पडलेले आहेत. यामुळे प्रवाशांना आणि स्थानिकांना दैनंदिन कामासाठी नाहक त्रास सहन करावा लागत आहे.
छाटणी केलेल्या फांद्यांचे ढिगारे, पालापाचोळा दोन-तीन दिवसांत उचलायला पाहिजे होता, मात्र पाच दिवस उलटूनही फांद्या, पालापाचोळा सुकल्याने इतरत्र पसरतो. त्यातच पावसामुळे लहानसहान फांद्या पालापाचोळ्याचा गाळ इतरत्र पसरतो. पालिकेने तातडीने हे ढिगारे उचलून पदपथ आणि चौक मोकळे करावे, अशी मागणी स्थानिकांमधून करण्यात येत आहे.