भिवंडी, ता.७ (बातमीदार): तालुक्यातील वडपे-ठाणे रस्त्यावरील पिंपळास जंक्शनवरील भुयारीमार्ग गेल्या वर्षांपासून अपूर्ण आहे. प्रशासनाने लेखी आश्वासन देऊनही महामार्गावरील कामे अर्धवट असल्याने ग्रामस्थांना जीव मुठीत घेऊन प्रवास करावा लागत आहे.
भिवंडी-ठाणे महामार्गावरील वडपे-ठाणे रस्त्यावरील पिंपळास जंक्शन येथे भुयारीमार्ग करारनाम्यात प्रस्तावित आहे. काम वेळेत झाले नसल्याने भूमिपुत्र शेतकरी संघटनेने एमएसआरडीसीच्या कार्यकारी अभियंत्याकडे लेखी तक्रार केली होती. एमएसआरडीसी इन्फ्रास्ट्रक्चर प्रोजेक्ट्स लिमिटेड यांनी पिंपळास जंक्शन येथील प्रस्तावित भुयारीमार्गाचे काम राष्ट्रीय महामार्ग मानकानुसार करण्यात येत आहे. त्यानुसार पिंपळास येथे भुयारी मार्ग प्रस्तावित आहे. पण रस्त्याच्या भौगोलिक परिस्थितीनुसार रस्त्याचा उतार तीव्र ठेवण्यात आल्याने विद्यार्थी, नोकरदार, व्यावसायिकांना जीव मुठीत घेऊन प्रवास करावा लागत आहे. तसेच पिंपळास महामार्गापासून ८० मीटर अंतरापर्यंत उतार देऊन बांधकाम करण्यात येणार आहे. जंक्शनपासून ४० मीटर अंतरापर्यंत संरक्षण भिंतीचे बांधकाम करण्यात येणार आहे. सध्या अस्तित्वातील रस्त्याची रुंदी ५ मीटर इतकी असून त्याच रुंदीचा कॉक्रिटचा रस्ता बांधण्यात येणार आहे. पण मूळ महामार्गाच्या मार्गिकेतील भुयारी मार्गाकडे दुर्लक्ष केले जात आहे.
-------------------------------
अपघातांची मालिका
भिवंडीत जाण्यासाठी माणकोली येथून दीड ते दोन किलोमीटर पुढे जाऊन पुन्हा मागे यावे लागते. तर रांजणोली दीड किलोमीटर मागे असून उलट प्रवास केल्याने अपघाताची भीती असते. या महामार्गावर दुचाकी वाहने चालविणे धोक्याचे असून महिन्याभरापूर्वी पिंपळास गावातील अरुण पाताळे (४२) याचा अपघात झाला होता. त्याच्या कमरेला आणि हाताला मार उभे राहता येत नाही. त्यामुळे महामार्गावरील भुयारी मार्गाकडे होणाऱ्या दुर्लक्षाविरोधात पिंपळास ग्रामस्थ आंदोलनाच्या तयारीत असल्याचे भूमिपुत्र शेतकरी संघटनचे अध्यक्ष जगदीश पाताळे यांनी सांगितले.
--------------------------------------