सकाळ वृत्तसेवा
नवी मुंबई, ता. ७ : नवी मुंबई महापालिका परिवहन उपक्रमातील घणसोली आगारात ४ जूनला इलेक्ट्रिक बसला लागलेल्या आगप्रकरणी एनएमएमटी प्रशासनाने उत्पादक आणि पुरवठादार कंपनीला नोटीस दिली आहे. एनएमएमटीच्या बसची जबाबदारी उत्पादक व पुरवठादार मे. एम. एच इको लाइफ तथा जे. बी. एम यांची आहे. केंद्र सरकारअंतर्गत कार्यरत असलेल्या सीआयआरटी या संस्थेमार्फत परिवहन उपक्रमाच्या बस ताफ्यातील मे. जे. बी. एम. मेक सर्व बसचे थर्डपार्टी ऑडिट करून घेण्याबाबत आदेश दिलेले आहेत.
घणसोली येथे कार्यशाळेमध्ये दुरुस्तीकरिता उभी असलेल्या नवी मुंबई महापालिकेच्या परिवहन उपक्रमाच्या (मे. जेबीएम मेक) इलेक्ट्रिक बसला ४ जूनला सकाळी ७.२०च्या दरम्यान आग लागली. इलेक्ट्रिक बसला लागलेल्या आगीमुळे त्याच्या बाजूस उभ्या असलेल्या तीन बसचे आगीत मोठ्या प्रमाणात नुकसान झाले आहे. तसेच त्या दिवशी मार्ग क्रमांक १४४ वर कार्यरत असलेली (मे. जेबीएम मेक) इलेक्ट्रिक बस ही मरोळ बसस्थानक, अंधेरी पूर्व येथे सायंकाळदरम्यान आग लागून पूर्णपणे जळून खाक झाली. या दोन्ही दुर्घटनांमध्ये कोणतीही जीवितहानी झाली नाही. दोन्ही दुर्घटना या आयआर फेल्युअरमुळे बॅटरी पॅकमध्ये शॉर्टसर्किट होऊन घडल्याचे प्रथमदर्शनी निदर्शनास येत आहे. नवी मुंबई महापालिका परिवहन उपक्रमाच्या ताफ्यात सद्य:स्थितीत जेबीएमच्या इलेक्ट्रिक वातानुकूलित स्वमालकीच्या ३० बस तसेच जीसीसी तत्त्वावरील १६५ बस कार्यरत आहेत. या बसची नियमित दुरुस्ती करण्याची व सुट्ट्या भागांसह जबाबदारी मूळ उत्पादक व पुरवठादार मे एम. एच. इको लाइफ तथा जे. बी. एम यांची आहे.
-------------
सात दिवसांत अहवाल द्या!
भविष्यात आगीच्या घटनांची पुनरावृत्ती होऊ नये याची दक्षता घेण्याकरिता प्रतिबंधात्मक उपाययोजना करण्याचे निर्देश देऊन केंद्र सरकारअंतर्गत कार्यरत असलेल्या सीआयआरटी या संस्थेमार्फत परिवहन उपक्रमाच्या बस ताफ्यातील मे. जे. बी. एम. मेक सर्व बसचे थर्ड पार्टी ऑडिट करून घेण्याबाबत आदेश दिलेले आहेत. बसला लागलेल्या आगीसंदर्भात मूळ उत्पादक व पुरवठादार यांना नोटीस देण्यात आल्या असून, त्याचा अहवाल सात दिवसांच्या आत देण्याबाबत परिवहन व्यवस्थापक यांनी निर्देश दिले आहेत.