अंधेरीत रस्त्यावर गाळामुळे घाणीचे साम्राज्‍य
अपघाताचा धोका; पालिकेचे मात्र दुर्लक्ष
जोगेश्‍वरी, ता. ८ (बातमीदार) ः अंधेरी-जोगेश्‍वरीत नालेसफाईचे काम सुरू आहे, मात्र नाल्यातील गाळ काढून तो रस्त्यावरच टाकण्यात येत असल्याने गाळ रस्त्यावर पसरून वाहनासाठी अपघाताचे निमित्त ठरत आहे.
नाल्यांतील कचरा, गाळामुळे पहिल्या पावसात पाण्याच्या प्रवाहाला अडथळा निर्माण होऊन पूरस्थिती निर्माण होते. ही परिस्थिती उद्भवू नये म्हणून दरवर्षी पावसाळ्याआधी नाल्यातील गाळ, कचरा काढला जातो. नालेसफाईची कामे ३१ मेपर्यंत पूर्ण करणे अपेक्षित होते, मात्र अद्याप ती पूर्ण झालेली नाहीत. पूरस्थिती निर्माण होणारा परिसर तसेच मुख्य दर्शनी भागातील नालेसफाईवर प्रशासनाने जोर दिला आहे. त्याअंतर्गत नाल्यात मात्र आजही गाळ व कचरा जशाचा तसा असल्याचे दिसून येते. लहान-सहान गटारातदेखील प्लॅस्टिक, डेब्रिजचा कचरा पडलेला दिसून येत आहे. मजुरांच्या मदतीने छोटा वा भूमिगत गटारातील गाळ, कचरा काढण्यात आला आहे; मात्र तो ठरावीक ठिकाणचाच साफ केलेला दिसून येतो. अंधेरी पूर्वेच्‍या जुना नागरदास मार्गावर निवासी भागातील रस्त्यांच्या कडेला काढण्यात आलेला गाळ रस्त्यावर पसरला आहे. गाळाने माखलेल्या या रस्त्यावरून वाहने घसरत आहेत.

दुर्गंधीमुळे नागरिक त्रस्त
गेल्या आठ दिवसांपासून भूमिगत गटाराचा हा गाळ उचलला जात नसल्याने दुर्गंधीमुळे नागरिक, दुकानदार त्रस्त झाले आहेत. त्यातच वाहनामुळे गाळ रस्त्यावर पसरून आणखी घाणीचे साम्राज्य निर्माण होते. अंधेरी पूर्वेतील जुना नागरदास रोड नाक्‍यावरील वळणावरील सिग्‍नलवरच्‍या परिसरातील मोठ्या नाल्यातील गाळ अशाच प्रकारे रस्त्याच्या कडेला काढून टाकण्यात आला आहे. यामुळे वाहनचालकांना वाहने हळू चालवा, अशी सूचना देत आहेत.

सोबत छायाचित्र