पनवेल, ता. ९ (बातमीदार) : पनवेल पालिकेच्या वतीने गुरुवारी आयुक्त मंगेश चितळे यांच्या मार्गदर्शनाखाली माझी वसुंधरा अभियान व पर्यावरणदिनानिमित्त ‘द सायकल सभा’ हा नावीन्यपूर्ण अभिनव उपक्रम आयोजित करण्यात आला होता. या वेळी ‘पर्यावरणाच्या दृष्टीने सायकलीचे महत्त्व’ या विषयावर आधारित विशेष चर्चासत्र पार पडले. या कार्यक्रमात सायकलिंगच्या विविध प्रतिनिधींना सन्मानचिन्ह देऊन गौरविण्यात आले.
सायकलचा वापर हा आरोग्यदायी जीवनशैलीसाठी महत्त्वपूर्ण आहे. सायकल हा पर्यावरणपूरक वाहतुकीचा एक प्रभावी पर्याय आहे, ज्यामुळे प्रदूषणही होत नाही व गर्दी कमी होते. हा संदेश नागरिकांना देण्यासाठी माझी वसुंधरा उपक्रमांतर्गत उपायुक्त स्वरूप खारगे यांच्या मार्गदर्शनाखाली महापालिकेच्या वतीने सायकल रॅलींचे आयोजन करण्यात येत असते. या कार्यक्रमात महापालिका कार्यक्षेत्रातील सुमारे १०हून अधिक सायकलिंगच्या विविध गटांचे प्रतिनिधी उपस्थित होते. पर्यावरण संरक्षण, शाश्वत जीवनशैली व हरित वाहतूक यावर माहितीपूर्ण चर्चा या वेळी करण्यात आली. तसेच उपस्थित सायकलिंगच्या विविध गटांच्या प्रतिनिधींना सन्मानचिन्ह देऊन गौरविण्यात आले. आद्य क्रांतिवीर वासुदेव बळवंत फडके नाट्यगृहात पार पडलेल्या या कार्यक्रमाला सहाय्यक आयुक्त श्रीराम पवार, पर्यावरण विभागप्रमुख प्रफुल घरत, महापालिका अधिकारी व कर्मचारी उपस्थित होते.