पर्यावरणपूरक गणेशोत्सवासाठी सहकार्य गरजेचे
महापालिका आयुक्त अभिनव गोयल यांचे आवाहन

कल्याण, ता. १० (वार्ताहर) : यंदा गणेशोत्सव पर्यावरणपूरक साजरा करण्यासाठी कल्याण-डोंबिवली महापालिकेला सहकार्य करावे, असे आवाहन आयुक्त अभिनव गोयल यांनी सोमवारी (ता. ९) केले. श्री गणेशोत्सवाच्या पार्श्वभूमीवर महापालिका क्षेत्रातील मूर्तिकारांना शाडू मातीचे विनामूल्य वितरण करण्यात आले. या वेळी उपस्थित मूर्तिकारांशी संवाद साधताना महापालिका आयुक्त अभिनव गोयल यांनी हे प्रतिपादन केले.

पीओपीच्या वापाराबाबत सरकारच्या मार्गदर्शक सूचना आपल्याला याआधीच प्राप्त झालेल्या आहेत. त्यामुळे गणेशमूर्ती बनविण्यासाठी लागणारी शाडू माती आपण उपलब्ध करून देत आहोत. मूर्तिकारांनीदेखील पर्यावरणपूरक मूर्ती वापराबाबत जनजागृती करावी, तसेच त्यांना जागा उपलब्ध करून देण्यासाठी महापालिका सहकार्य करेल, असे आयुक्त अभिनव गोयल यांनी उपस्थित मूर्तिकारांना आश्वासित केले.

विनामूल्य शाडू माती उपलब्ध करून देण्याबाबत महापालिकेने एक चांगले पाऊल उचलले आहे. ही शाडू माती पुढील वर्षी श्री गणेशोत्सवापूर्वी किमान सहा महिने आधी द्यावी तसेच महापालिका आयुक्तांनी मूर्तिकारांसाठी जागा उपलब्ध करून द्यावी, अशी मागणी उपस्थित मूर्तिकारांनी केली.

पर्यावरण विभागाच्या कार्यकारी अभियंता रोहिणी लोकरे यांनी मूर्तिकारांना त्यांच्या आवश्यकतेनुसार शाडू माती उपलब्ध करून दिली जाईल, अशी माहिती प्रास्ताविकात दिली. तसेच सर्व नागरिकांनी पर्यावरणपूरक मूर्तीच खरेदी करावी, त्याचप्रमाणे विसर्जनदेखील पर्यावरणपूरकच करावे, असे आवाहनही केले. महापालिका मुख्यालयात झालेल्या या कार्यक्रमाला अतिरिक्त आयुक्त हर्षल गायकवाड, पर्यावरण विभागाचे उपायुक्त संजय जाधव, कार्यकारी अभियंता रोहिणी लोकरे तसेच कल्याण-डोंबिवली महापालिका परिक्षेत्रातील अनेक मूर्तिकार उपस्थित होते.