उपजिल्हा रुग्णालयात स्वच्छतेचे तीनतेरा
रुग्णांचे आरोग्य धोक्यात; प्रशासनावर नाराजी
पेण, ता. १० (वार्ताहर) : पेण उपजिल्हा रुग्णालयात मागील अनेक वर्षांपासून स्वच्छतेचा अभाव जाणवत आहे. परिसरातील अनेक ठिकाणी साफसफाई व्यवस्थित होत नसल्याने रुग्णांच्या आरोग्यास धोका निर्माण झाला आहे. त्यामुळे दररोज रुग्णालयाची स्वच्छता करण्यात यावी, अशी मागणी सामाजिक कार्यकर्ते हरीश बेकावडे यांनी केली आहे.
तालुक्याच्या डोंगराळ भागातून अनेक आदिवासी बांधव, नागरिक तसेच गोरगरीब समाजातील रुग्ण उपचाराकरिता येथील उपजिल्हा रुग्णालयात येत असतात, मात्र या ठिकाणी अनेक समस्या उद्भवत असल्याने रुग्णांना अधिक उपचाराकरिता खासगी दवाखाने अन्यथा अलिबाग, मुंबई या ठिकाणी जावे लागते. त्यातच उपजिल्हा रुग्णालयातील परिसर तसेच अंतर्गत भागात स्वच्छतेची फार मोठी उणीव भासत असून, अनेक ठिकाणी दुर्गंधी येत असते. रुग्णालयातील बाथरूमची अस्वच्छता, तुटलेल्या खिडक्या, खिडक्यांना जाळी नसल्याने डासांचा त्रास, अनेक वॉर्डमधील तुटलेल्या लोंबकळणाऱ्या ट्युबलाइट, तुटलेले बाथरूमचे दरवाजे, शितपेटी, स्वच्छतेची अनियमितता, औषधांची कमतरता यासह इतरही समस्या रुग्णालयात मोठ्या प्रमाणावर दिसून येत आहेत, तर एका खासगी सिक्युरिटी कंपनीच्या माध्यमातून पेण उपजिल्हा रुग्णालयाच्या साफसफाईचा ठेका सुरू आहे. येथे साधारणपणे सात कर्मचारी साफसफाई करत असल्याचे कंत्राटदार यांनी सांगितले आहे, मात्र प्रत्‍यक्षात तीनच कर्मचारी कार्यरत असल्याचे सांगण्यात येत आहे. त्यामुळे रुग्णालयात सर्वत्र स्वच्छतेचा अभाव दिसून येत आहे.
.......................
पेण उपजिल्हा रुग्णालयात अनेक गोरगरीब, सर्वसामान्य रुग्ण उपचार घेत असतात, मात्र येथे असंख्य समस्या जाणवत असून, गेल्या काही वर्षांपासून स्वच्छतेचा फार मोठा अभाव निर्माण झाला आहे. रुग्णालयातील तसेच आजूबाजूचा परिसर स्वच्छ नसल्याने याकरिता अनेकदा पत्रव्यवहार केला आहे, परंतु याकडे उपजिल्हा रुग्णालय प्रशासनाचे दुर्लक्ष होत आहे.
हरीश बेकावडे, सामाजिक कार्यकर्ते
..................
पेण उपजिल्हा रुग्णालयामध्ये दररोज साफसफाई केली जाते; मात्र काही ठिकाणी स्वच्छतेचा अभाव असेल, तर तीसुद्धा तत्काळ दूर केली जाईल. येथील स्वच्छतेचा ठेका जुना असून, न्यू ज्वाला सिक्युरिटी फोर्स यांच्याकडे आहे. त्यांच्या माध्यमातून येथे तीन कर्मचारी साफसफाई करत आहेत.
-डॉ. संध्या राजपूत, वैद्यकीय अधिकारी, पेण उपजिल्हा रुग्णालय
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.