बोरिवलीत वृक्षारोपण, पर्यावरणाविषयी जनजागृती
मुंबई, ता. १० ः जागतिक पर्यावरणदिनाचे औचित्य साधून व पंतप्रधान नरेंद्र मोदींच्या यशस्वी कार्यकाळाला ११ वर्षे पूर्ण होत असल्याच्या निमित्ताने बोरिवलीचे आमदार संजय उपाध्याय व मुंबई महापालिका आर. मध्य विभाग यांच्या संयुक्त विद्यमाने बोरिवलीत जनजागृती कार्यक्रमाचे आयोजन करण्यात आले होते. या वेळी वृक्षारोपण करून पर्यावरणाविषयी उपस्‍थितांमध्ये जनजागृती करण्यात आली. आमदार संजय उपाध्याय यांच्या जनसंपर्क सेवालय कार्यालयाजवळ मोक्ष प्लाझासमोर बोरिवली पश्चिम येथे हा कार्यक्रम पार पडला. प्रदूषणाला आळा घालून प्लॅस्टिकचा वापर टाळावा, ओला कचरा, सुखा कचरा, घातक वस्तूंचे वर्गीकरण कसे करावे, यासंदर्भात माहिती या वेळी देण्यात आली. या कार्यक्रमात जमलेल्या नागरिकांनी आमदारांसमवेत स्वच्छतेची प्रतिज्ञा घेतली. चिकूवाडी येथे स्वर्गीय प्रमोद महाजन उद्यानात माजी खासदार गोपाळ शेट्टी, आमदार उपाध्याय यांनी वृक्षारोपण करून कार्यक्रमाची सुरुवात झाली. ‘स्वच्छ बोरिवली, सुंदर बोरिवली’ हा नारा देत प्लॅस्टिकमुक्त बोरिवली करण्याचा निर्धार करण्यात आला. या कार्यक्रमाला भारतीय जनता पक्षाचे सर्व पदाधिकारी, कार्यकर्ते, नागरिक, पालिकेतर्फे संदीप म्हाळुंगकर, दिनेश पाटील, माधव गायकवाड, अजय शिंदे, ऋतुजा धामणकर, सतीश शिरसाट, घनकचरा विभागाचे कर्मचारी आवर्जून उपस्थित होते.