धोकादायक संरक्षक भिंतीचे काम सुरू
मेघवाडीतील सूर्योदय सोसायटीतील रहिवाशांना दिलासा
जोगेश्‍वरी, ता. ११ (वार्ताहर) ः सर्वोदयनगर मार्गावरील कोकण नगरजवळील मेघवाडी सूर्योदय सोसायटीलगत कंपाउंडजवळ जमीन खचण्याची घटना गुरुवारी (ता. ५) घडली होती. याबाबत ‘सकाळ’च्या रविवारच्या (ता. ८) अंकात वृत्त प्रकाशित करण्यात आले होते. याची दखल घेत विकसकाने येथील संरक्षक भिंतींचे काम सुरू केले आहे.
येथील दगड-मातीचा ढिगारा खचल्‍याने रहिवाशांमध्ये भीतीचे वातावरण होते. त्यामुळे लवकरात लवकर आमचे पुनर्वसन करावे, अशी मागणी येथील रहिवाशांनी केली होती. गेल्या काही दिवसांपासून मुंबईत मोठ्या प्रमाणावर पाऊस कोसळला होता. त्याचा परिणाम म्हणून येथील जमीन खचली होती. बातमीची तातडीने दखल स्‍थानिक आमदार रवींद्र वायकर व नव्‍याने येथे पुनर्विकास करू पाहणाऱ्या विकसक बिद्रा यांनी घेतली. आमदार वायकर यांनी विकसकाबरोबर चर्चा केली. तसेच येथे लागूनच सुरू असलेल्‍या बांधकाम प्रकल्‍पाच्या विकसकाला संरक्षक भिंत बांधून देण्याच्या सूचना केल्‍या. त्‍यानंतर येथील कामाला सुरुवात करण्यात आली आहे.