तुर्भे, ता. ११ (बातमीदार) : विकास आराखड्यातून खेळाचे मैदान रद्द करण्याच्या मागणीसाठी जुईनगर आणि शिरवणे ग्रामस्थांनी महापालिकेच्या विरोधात बुधवारी (ता. ११) धडक मोर्चा काढला होता. मैदान वाचवण्यासाठी नवी मुंबईतील शेकडोहून अधिक ग्रामस्थ मोर्चात सहभागी झाले होते. या वेळी मोर्चेकऱ्यांनी ‘मैदान आमच्या हक्काचे, नाही कोणाच्या बापाचे’ अशा घोषणा देत पालिका प्रशासनाला जागे करण्याचा प्रयत्न केला.
जुईनगर सेक्टर २१ येथे असलेल्या भूखंडावर आतापर्यंत मैदानाचे आरक्षण होते. त्यानुसार येथील नागरिक खेळासाठी, फिरण्यासाठी या मैदानाचा वापर करीत आले आहेत; मात्र मुंबई उच्च न्यायालयात २०२४ मध्ये दाखल झालेल्या जनहित याचिकेचा दाखला घेत या ठिकाणची माती काढण्यासाठी निविदा मागवण्यात आली होती. त्यानंतर या मैदानावर असलेले आरक्षण लक्षात आणून दिल्यावर ही निविदा थांबवण्यात आली होती. शहर विकास आराखडा मंजुरीसाठी गेलेला असताना आणि त्यावर कोणताही निर्णय आलेला नसताना, या भूखंडाचे आरक्षण बदलण्यात आले. आता पुन्हा या भूखंडावरील माती काढण्याचे काम सुरू होत आहे. केवळ कंत्राटदाराचा फायदा करून देण्यासाठी महापालिका अधिकारी हे काम करीत आहेत, असा आरोप ग्रामस्थांनी केला आहे. या वेळी माजी नगरसेवक एम. के. मढवी, माजी नगरसेवक काशिनाथ पाटील, माजी नगरसेविका माधुरी सुतार यांच्यासह असंख्य ग्रामस्थ मोर्चात सहभागी झाले होते.
--------------
मोर्चामध्ये असणारी गर्दी पाहता मैदान किती गरजेचे आहे, हे स्पष्ट होत आहे. मैदान आहे तिथेच राहिले पाहिजे, ही आमची प्रमुख मागणी आहे. आजचा मोर्चा हा कोणा एका व्यक्तीचा नसून समस्त खेळाडूंचा आहे. त्यामुळे विकास आराखड्यातून मैदान रद्द करून मैदान आहे तसेच ठेवावे.
- डॉ राजेश पाटील, नवी मुंबई जिल्हा अध्यक्ष, भाजप