आग्रोली गावातील समाज मंदिराची दुरवस्था
गर्दुल्ल्यांचा वाढता वावर; स्‍थानिकांकडून दुरुस्तीची मागणी
तुर्भे, ता. ११ (बातमीदार) ः नवी मुंबई महापालिकेच्या माध्यमातून आग्रोली गावालगत उड्डाणपुलाखाली बांधण्यात आलेल्या समाज मंदिराची दुरवस्था झाली आहे. ग्रामस्थांना विविध सामुदायिक कार्यक्रमासाठी बेलापूर विभाग कार्यालयाच्या माध्यमातून समाज मंदिराच्या वापरासाठी शुल्क भरावे लागते, परंतु समाज मंदिराच्या देखभाल दुरुस्तीकडे महापालिकेच्या संबंधित विभागाच्या अधिकाऱ्यांचे दुर्लक्ष होत असल्याने नाराजी व्‍यक्‍त केली जात आहे.
नवी मुंबईतील नागरिकांना विविध सांस्‍कृतिक कार्यक्रमासाठी पालिकेच्या माध्यमातून समाज मंदिराची उभारणी करण्यात आली आहे, मात्र या समाज मंदिराच्या देखभालीकडे पालिकेचे दुर्लक्ष होत असल्याने त्‍यांची दुरवस्‍था झाली आहे. अशाच प्रकारे आग्रोली गावालगत उड्डाणपुलाखाली बांधण्यात आलेल्या समाज मंदिराची दुरवस्था झाली आहे. सभागृहाच्या खिडक्यांचे लोखंडी ग्रिल तसेच स्लायडिंगच्या काचा फुटलेल्या आहेत, मुख्य दरवाजादेखील खराब झाला आहे. समाज मंदिराच्या आतील बाजूच्या भिंतींचे रंगकाम, तळ भागातील फरशी, प्रसाधनगृह तसेच छताचीदेखील दुरवस्था झाली आहे. तसेच समाज मंदिराच्या भिंतीवर लघुशंका केली जात आहे. त्‍यामुळे परिसर दुर्गंधीयुक्त झाला आहे. याशिवाय समाज मंदिराच्या परिसरात रात्रीच्या वेळीस गर्दुल्ल्यांचा वावरदेखील वाढला आहे. त्या ठिकाणी सुरक्षा रक्षक नसल्याने रात्रीच्यावेळी दारूच्या पार्ट्यादेखील आवारात झोडल्या जात आहेत. त्‍यामुळे स्‍थानिकांकडून नाराजी व्‍यक्‍त होत आहे. विशेष म्‍हणजे पालिकेच्या माध्यमातून समाज मंदिरासाठी शुल्क आकारले जाते, मात्र नागरिकांना कोणत्याही प्रकारची सोयीसुविधा देण्यात येत नाही, शिवाय इमारतीची दुरवस्‍था झाल्याने मागील काही दिवसांपासून अनेकांनी सांस्‍कृतिक कार्यक्रम रद्द केले आहेत.