गुंतवणुकीच्या नावाखाली कोटींची सायबर फसवणूक
नवी मुंबई पोलिसांकडून दोन आरोपी गजाआड
नवी मुंबई, ता. ११ (वार्ताहर) ः आयपीओ व इंडेक्स ट्रेडिंगमधील गुंतवणुकीत अधिक नफा मिळवून देण्याचे प्रलोभन दाखवत चार कोटी ७१ लाख ६५ हजार रुपयांची सायबर फसवणूक करणाऱ्या टोळीतील दोन आरोपींना नवी मुंबईच्या सायबर पोलिसांनी अटक केली आहे. या गुन्ह्यातील आरोपींचा महाराष्ट्रासह देशभरातील अन्य राज्यांतील १० सायबर फसवणूक प्रकरणात सहभाग असल्याचे निष्पन्न झाले आहे. त्यानुसार सायबर पोलिसांकडून या आरोपींची कसून चौकशी करण्यात येत आहे.
या प्रकरणात फसवणूक झालेले ७० वर्षीय ज्येष्ठ नागरिक वाशीमध्ये राहण्यास असून, ते मंत्रालयातील सेवानिवृत्त अधिकारी आहेत. गत ३० नोव्हेंबर २०२४ रोजी या ज्येष्ठ नागरिकाने शेअर्समध्ये गुंतवणुकीबाबत फेसबुकवर आलेली जाहिरात पाहून त्यात आपली माहिती भरली होती. त्यानंतर सायबर टोळीने त्यांना संपर्क साधून एका व्हॉट्सॲप ग्रुपमध्ये सहभागी करून घेतले होते. त्यानंतर या टोळीने त्यांना आयपीओ व इंडेक्स ट्रेडिंगमध्ये अधिक लाभ मिळवून देण्याचे आश्वासन देत त्यांचा विश्वास संपादन केला होता. त्यानंतर या टोळीने गुंतवणुकीसाठी विविध बँक खात्यांवर रक्कम पाठवण्यास सांगून त्यांच्याकडून चार महिन्यांमध्ये चार कोटी ७१ लाख ६५ हजार रुपये उकळून त्यांची फसवणूक केली होती. त्यानंतर या ज्येष्ठ नागरिकाने सायबर पोलिस ठाण्यात धाव घेऊन तक्रार दाखल केली होती. त्यानंतर सायबर पोलिस ठाण्याचे वरिष्ठ पोलिस निरीक्षक गजानन कदम व पोलिस उपनिरीक्षक रोहित बंडगर यांच्या पथकाने तांत्रिक तपास व या गुन्ह्यातील बँक खात्याचे विश्लेषण केले असता, काही रक्कम करंजाडे येथे राहणारा इस्टेट एजंट विकास प्रकाश गव्हाणे (वय २७) याच्या खात्यात गेल्याची माहिती मिळाली. या माहितीच्या आधारे पोलिसांनी विकासला अटक केली. त्याच्या चौकशीत वाशिम जिल्ह्यातील मनोज विष्णू कालापाड (वय २२) याच्या सांगण्यावरून त्याने त्याचे बँक खाते दिल्याचे आढळून आले. त्यानुसार पोलिसांनी वाशिम येथून मनोज कालापाड यालादेखील अटक केली. या दोन्ही आरोपींना चार दिवसांची पोलिस कोठडी सुनावण्यात आली आहे. सायबर पोलिसांनी आता या गुन्ह्यातील इतर आरोपींचा शोध सुरू केला आहे.